پێشنیوەڕۆی ئەمڕۆ پێنجشەممە، لە کۆلێژی یاسای زانکۆی ئیشق لە ھەولێر، سیمینارێکی تایبەت بە ناونیشانی (بەشوودانی پێشوەختەی کچان لەنێو کۆمەڵگەی کوردستانیدا، بەڕێوە چوو.



ئەمڕۆ پێنجشەممە 22/12/2016 لە کۆلێژی یاسای زانکۆی ئیشق لە ھەولێر، سیمینارێکی تایبەت بە ناونیشانی (بەشوودانی پێشوەختەی کچان لەنێو کۆمەڵگەی کوردستانیدا، بە ئامادەبوونی ژمارەیەک لە قوتابیان، مامۆستایان، یاساناسان و چالاکوانانی بواری مافی ئافرەت ڕێک خرا.



لەم سمینارەدا، گفتوگۆیەکی رژد لەبارەی کێشە و گرفتەی ئەو کچانەی کە لە خوار تەمەنی گونجاوەوە یان لەو تەمەنەی کە لە ڕووی تەندروستی و کۆمەڵایەتییەوە بۆ ھاوسەرگیری ئامادە نین، ئەنجام درا.



سۆزان عارف، سەرۆکی ڕێکخراوی تواناسازیی ئافرەتان، لەو سمینارەدا، بابەتێکی پێشکەش کرد و وێڕای ئاماژەدان بە ھەندێ ئامار و کەیس کە ڕێکخراوەکەیان کاری لەسەر کردووە، باسی لەو کێشەیە کرد و ڕەخنەی لە ھەموو ئەو لایەن، کەسایەتی و خێزانانەش گرت، کە ڕێخۆشکەر و ئاسانکارن لە بەشوودانی پێشوەختەی کچاندا.



ھاوکات لە سمینارەکەدا، کۆمەڵێک لە مامۆستایانی زانکۆ، بەشی یاساناسی، لە رووی یاسایی و زانستی شەرعەوە ئەو دیاردەیەیان تاوتوێ کرد، پرسیار و سەرنجی بەشێکی بەرچاو لە خوێندکارانیش، بابەتی سیمینارەکەی دەوڵەمەندتر کرد.
bas news-