سوپای توركیا كوژرانی‌ چوار سه‌ربازو برینداربوونی‌ 15 ی‌ دیكه‌ی‌ راگه‌یاند، له‌ئه‌نجامی‌ شه‌ڕی نێوان هێزه‌كانی قه‌ڵغانی فورات به‌ پشتیوانی سوپاو چه‌كدارانی‌ داعش له‌ ده‌وروبه‌ری شاری باب له‌ باكوری سوریا.


به‌ پێی به‌یاننامه‌یه‌كی سوپای توركیا به‌یانی ئه‌مڕۆ شه‌ڕ له‌ نزیكی نه‌خۆشخانه‌ی كۆنی شاری باب رویداوه‌ كه‌ شوێنێكی ستراتیژییه‌ و داعش وه‌كو باره‌گای سه‌ره‌كی به‌كاریده‌هێنێت و به‌ كونتڕۆڵكردنی نه‌خۆشخانه‌كه‌ شاری باب ده‌كه‌وێته‌ ژێر كونترۆڵی‌ هێزه‌كانی‌ قه‌ڵغانی‌ فوراته‌وه‌، به‌و هۆیه‌وه‌ داعش به‌رگری زۆر ده‌كات بۆ پاراستنی ئه‌و شوێنه‌.

به‌پێی به‌یاننامه‌كه‌، له‌و شه‌ڕه‌دا چوار سه‌رباز كوژراون و 15 دیكه‌ بریندار بوون و گواستراونه‌ته‌وه‌ نه‌خۆشخانه‌ی شاری كلیس، هه‌روه‌ها 40 تیرۆریستی داعش كوژراون و چوار ئۆتومبێلی بۆمبرێژكراویش له‌ لایه‌ن فرۆكه‌ جه‌نگیه‌كانی توركیاوه‌ ته‌قێنراونه‌ته‌وه‌.

بەرەبەیانی 24ی ئابی ئەمساڵ سوپای توركیا‌و بەشێك لەئۆپۆزسیۆنی چەكداری سوریا لەنێویاندا سوپای سوریای ئازاد، ئۆپەراسیۆنی قەڵغانی فورات-یان لەناو خاكی سوریادا راگەیاند، بەبیانووی دەرهێنانی شارە سنووریەكانی ئەو وڵاتە وەك جەرابلوس‌و دواتریش شاری باب كە نزیكن لە سنوری توركیا، لەژێر چنگی داعش.

xendan -