سه‌رۆكى فراكسیۆنى برایه‌تى و پێكه‌وه‌ژیان له‌ ئه‌نجوومه‌نى پارێزگاى نه‌ینه‌وا، ڕای ده‌گه‌یه‌نێت، پارتى كرێكارانى كوردستان (pkk) له‌ چیاى شنگال، ده‌ستی كردووه‌ به‌ درووستكردنى چه‌ند بنكه‌یه‌ك، ئه‌مه‌ش وه‌ك ئه‌و به‌رپرسه‌ ئاماژه‌ى پێ ده‌دات، ده‌بێته‌ مه‌ترسى بۆ سه‌ر ئاواره‌كانى چیای شنگال.





سه‌یدۆ چه‌تۆ، سه‌رۆكى فراكسیۆنى برایه‌تى و پێكه‌وه‌ژیان له‌ ئه‌نجوومه‌نى پارێزگاى نه‌ینه‌وا، به‌ (باسنیوز) ڕای گه‌یاند :" په‌كه‌كه‌ ده‌ستی كردووه‌ به‌ درووستكردنى ژماره‌یه‌ك بنكه‌ بۆ جێگیركردنى هێزه‌كانى له‌ چیاى شنگال".



جه‌ختیشی كرده‌وه‌، كه‌ درووستكردنى ئه‌و بنكانه‌، ده‌بێته‌ مه‌ترسى بۆ سه‌ر ئاواره‌كانى چیاى شنگال و نه‌توانن بگه‌ڕێنه‌وه‌ شوێنى خۆیان.



سه‌رۆكى فراكسیۆنه‌ كوردستانییه‌كه‌ى ئه‌نجوومه‌نى پارێزگاى نه‌ینه‌وا، گوتیشی :" ئه‌گه‌ر به‌راوردێك له‌گه‌ڵ ناوچه‌كانى زوومار و ڕه‌بیعه‌ و سنوونى بكه‌ین كه‌ پێش دوو ساڵ ڕزگار كران، تا ئێستا 95% خه‌ڵكى زومار چوونه‌ته‌وه‌ سه‌ر ماڵى خۆیان، و به‌ڕێژه‌ى 80% ڕه‌بیعه‌ش چوونه‌ته‌وه‌، زیاتر له‌ 8 هه‌زار خێزانیش له‌ سنوونى چوونه‌ته‌وه‌ بۆ سه‌ر زێدى خۆیان، ئه‌وه‌ش له‌به‌ر ئه‌وه‌ى په‌كه‌كه‌ له‌و ناوچانه‌دا بوونیان نییه‌، به‌ڵام له‌ شنگال به‌هۆى بوونى په‌كه‌كه‌وه‌، تائێستا ژماره‌یه‌كی كه‌م خه‌ڵكى گه‌ڕاونه‌ته‌وه‌".

BAS NEWS -