قایمقامی شارۆچکەی پێنجوێن، ئاماژە بەوە دەدات کە کۆمپانیایەک بەناوی ئەوانەوە فلتەری فرۆشتوە، بۆیە لە ڕێگەی پۆلیسەوە ئەو کۆمپانیایە لەو کارەی ئاگادار کراوەتەوە و ڕێگری لێکراوە.



زانا ڕەحمان، قایمقامی شارۆچکەی پێنجوێن، بە (باسنیوز)ی ڕاگەیاند: "ماوەیەکە کۆمپانیایەکی تایبەت بەدانانی فلتەری ئاوی خواردنەوە بۆ ماڵان، لەناو شارۆچکەی پێنجوێندا، ھەوڵی فرۆشتنی فلتەری ئاو دەدات و گومان لەسەر پاک بوونی ئاوی ماڵان لای ھاووڵاتیان دروست دەکرد، بۆیە وەک قایمقامیەت و فەرمانگەی ئاوی پێنجوێن، ڕێگەمان نەداوە کە بەفەرمی و بەناوی ئێمەوە، فلتەر بفرۆشرێت، لە ڕێگەی بنکەی پۆلیسی پێنجوێنیشەوە کۆمپانیا ئاگادار کردەوە، کە بۆ ساغکردنەوەی بەرھەمەکانیان، پێویستە ھاووڵاتیان نەترسێنێت و فێڵیان لێنەکات".



قایمقامی پێنجوێن، ئەوەشی ڕوون کردەوە: "دڵنیایی دەدەینە ھاووڵاتیان، کە ئاوی خواردنەوەی ماڵەکانیان کە لەلایەن فەرمانگەی ئاوی پێنجوێنەوە سەرپەرشتیدەکرێت، ھیچ کێشەیەکی تەندروستی نییە و بەپێی ڕاپۆرتی چاودێری تەندروستی ئاوی پێنجوێن، ھیچ مەترسیەکی بۆ سەر تەندروستی مرۆڤ نییە".
دەشڵێت: "ئێمە ناتوانین ڕێگەی کارکردن لە ھیچ کۆمپانیایەک بگرین، کە بەفەرمی ڕێگەپێدانی لەلایەن حکوومەتەوە ھەبێت، بەڵام ھاووڵاتیان خۆیان سەرپشکن لە کڕینی یان نەکڕینی ئامێرەکە".
bas news-