"قەیس خەزعەلی سەرۆکی گرووپی چەکداریی عەسائیب ئەھلی ھەق لە چاوپێکەوتنێکی تەلەفزیۆنی لەگەڵ کەناڵی ئەلڕەشید ھەندێ بۆچوونی نابەجێی لەبارەی کوردستان و پێشمەرگە و بەڕێز سەرۆکی ھەرێمی کوردستان و قۆناغی دوای داعش خستووەتەڕوو و پێیوایە دوای داعش گەورەترین کێشەی عێراق کوردە.



ئەمە جاری یەکەم نییە ئەم کابرایە قسەی لەمشێوەیە و ھەڕەشەئامێز بەرانبەر بە گەلی کوردستان دەکات. ھیوادارین ئەم وتە نابەجێیانەی تەنیا بۆچوونی خۆی و چەکدارەکانی بێت و لەو بڕوایەیش نین کە ئەو نوێنەرایەتیی حەشدی شەعبی بکات. داوایش لە سەرکردایەتیی حەشدی شەعبی دەکەین ھەڵوێستی خۆیان لەسەر وتەکانی خەزعەلی دەرببڕن.



گەلی کوردستان و پێشمەرگە چاویان لە خاکی کەس نییە و ھەرگیز نەچوونەتە سەر ماڵی کەس. ئەوەی ھاتبێتە سەر ماڵی خەڵکی کوردستان و نیازی داگیرکردنی خاکی گەلی کوردستانی ھەبێت لە کۆتاییدا بە تیاچوونی خۆی تەواو بووە.



بە دڵنیاییەوە خەزعەلی و ھاوشێوەکانی کە بیانەوێ کوردستان داگیر بکەن چارەنووسێکی باشتر لە داعشیان نابێت و نایشتوانێ داعشئاسا بێت و لە کوردستان خەڵک لەسەر ناسنامە و مەزھەب سەر ببڕێ."
payamner -