یەکێک لەو پێشمەرگانەی کە خەڵاتی وەزیری بەرگری ئەمەریکای پێ بەخشدرا، باس لە چۆنیەتی وەرگرتنی خەڵاتەکە دەکات وڕای ده‌گه‌یه‌نێت، ئەوەی به‌ئێمه‌بەخشدراوە، نیشانەی ئازایەتی و سەرکەوتنی پێشمەرگەیە.




دوای ئەوەی بە سەردانێك گەیشتە هەولێر، ئاشتن كارتەر، وەزیری بەرگری ئەمریكا میدالیای ئازایەتی بەخشییە چوار پێشمەرگە، ئەوەش وەك پێزانینی ئەمریكا بۆ خەبات و شه‌ونخوونى هێزەكانی پێشمەرگە دژی داعش، ئەو چوار پێشمەرگەیە هەر یەکیان لە بوارێک قارەمانییەتیان نواندووە.

له‌وباره‌یه‌وه‌، نائیب کۆسار ساڵح، یەکێک لەو پێشمەرگانەی کە خەڵاتەکەی پێدراوه‌، بۆ ئاژانسى هه‌واڵى (باسنیوز) گوتى :" ئەو خەڵاتە لەسەر بنەمای ئازایەتی بەخشرا بەو چوار پێشمەرگەیە کە یەکێکیان من بووم".




ڕوونی كرده‌وه‌، كه‌ لە ماوەی ڕابردوودا، وەک ئەندازیاری هەڵگرتنەوەی مین کارى کردووە، گوتیشی :" ئەو خەڵاتە پەیامی خۆی هەیە بەوەی ئیدارەی ئەمەریکا لەوە دەگات، ئەوەی پێشمەرگە کردوویەتی لەماوەی رابردوودا سەرکەوتنێکی یەکجار گەورەی لە ئاستی هەرێمیی و نێودەوڵەتی، بەدەستهێناوە".


ئەوەشی خستەروو، کە ئەمەریکا و هاوپەیمانان بەم خەڵاتە دەیانەوێت پەیامێک بگەیەنن به‌وه‌ى بەردەوامن لە هاوکاری و هەماهەنگی پێشمەرگە.
BAS NEWS-