به‌ڕێوه‌به‌رى خوێندنى به‌شی كوردی له‌ كه‌ركووك، ڕایده‌گه‌یه‌نێت كه‌ هه‌موو هه‌وڵه‌كانى خۆیان بۆ چاره‌سه‌ركردنى گرفتی خوێندنى به‌شی كوردى له‌ كه‌ركووك خستووه‌ته‌ گه‌ڕ و كاریان له‌ سه‌ر ئه‌وه‌ كردووه‌ ده‌رگاى قوتابخانه‌كان دانه‌خرێت.

ئه‌مڕۆ یه‌كشه‌ممه‌ 16/10/2016، شێرزاد ڕه‌شید، به‌ڕێوه‌به‌رى خوێندنی به‌شی كوردى له‌ كه‌ركووك، ڕاى گه‌یاند: "مامۆستایانی به‌شى خوێندنى كوردى له‌ كه‌ركووك ناڕه‌زایی له‌ به‌رامبه‌ر دواكه‌وتنى موچه‌كانیانه‌وه‌ ده‌رده‌بڕن، ئێمه‌ش لاى خۆمانه‌وه‌ پشتگیری ئه‌و داوایه‌ى مامۆستایانمان كردووه‌ و هه‌وڵی چاره‌سه‌ركردنى گرفته‌كانى خوێندنى به‌شی كوردیمان داوه‌، به‌ هه‌ر شێوه‌یه‌ك بێت، ناكرێت ده‌رگای قوتابخانه‌كان دابخرێت".

به‌ڕێوه‌به‌رى به‌شی خوێندنى كوردى له‌ كه‌ركووك، گوتیشی: "پێویسته‌ ئێمه‌ به‌ وریاییه‌وه‌ مامه‌ڵه‌ له‌ گه‌ڵ دۆخی ئێستای خوێندنى به‌شى كوردى بكه‌ین، له‌ به‌ر ئه‌وه‌ى له‌ كه‌ركووك، ئه‌لته‌رناتیفی خوێندنى كوردى هه‌یه‌ كه‌ ئه‌ویش خوێندنى عه‌ره‌بییه‌، ئێستاش ئه‌گه‌ر ده‌رگاى قوتابخانه‌ كوردیه‌كان دابخرێت ئه‌و كاته‌ خه‌ڵك منداڵه‌كانیان ده‌خه‌نه‌ به‌ر خوێندنى عه‌ره‌بی".










باسنیوز