پەرلەمانتارێکی بزووتنەوەی گۆڕان ئاماژە بەوە دەکات، ئەوان پێیان خۆش نییە یەکێتی ببێتە دوو بەش، ئەوەش ناشارێتەوە کە کێشەکانی یەکێتی کاری لە ڕێککەوتنەکەیان لەگەڵ گۆڕان کردووە.

بەهار مەحموود، پەرلەمانتاری فراکسیۆنی گۆڕان لە پەرلەمانی کوردستان، ڕایگەیاند: “ئێمە وەک بزووتنەوەی گۆڕان، هەوڵمان داوە بارودۆخی یەکێتیی نیشتمانیی کوردستان، بەرەو باشی بڕوات، ئەوەی ڕووی داوە، پێمان ناخۆش بووە، چونکە ڕێککەوتنی سیاسیمان لەگەڵیاندا هەیە”.

بێ ئاگایی خۆشی لەوە دەربڕی کە نەوشیروان مستەفا، ڕێکخەری گشتیی گۆڕان، هیچ دەستپێشخەرییەکی بۆ کێشە ناوخۆییەکانی یەکێتی هەبێت. گوتیشی: “هەردوو باڵەکەی یەکێتی، کۆکن لەسەر ڕێککەوتنی خۆیان و گۆڕان، ئەو ڕێککەوتنە بە شتێکی باش دەزانن، بەڵام لە میکانیزمی جێبەجێکردنی ڕێککەوتنەکەدا کەمێک قورسە".

ئەو پەرلەمانتارەی گۆڕان ئەوەی نەشاردەوە کە کێشەکانی یەکێتی، کاریگەری لەسەر جێبەجێکردنی خاڵەکانی ڕێککەوتنەکەی نێوان گۆڕان و یەکێتی کردووە. بۆیە دەڵێت: “هەوڵ دەدەین هەردوو ئاراستەی ناو یەکێتی بکەینەوە بە یەک و وەک یەکیش سەیری هەردوو ئاراستەکە دەکەین".












باسنیوز