ئەنجوومەنی هاوئاهەنگی ریفۆرمخوازانی پارێزگای سنە دەربارەی رەتکردنەوەی شیاویەتی هەندێک لە بەربژێرەکانیان بۆ هەڵبژاردنی پەرلەمانی ئێران راگەیێندراوێک بڵاودەكاتەوە و رایدەگەیێنێت، رەتکردنەوەی کاندیدەکانیان لە زیانی حکومەتی ئێران دایە. بڕیارە لە 26-2-2016 هەڵبژاردنی خولی دەیەمی پەرلەمانی ئێران ئەنجامبدرێت.

لە راگەیێندراوەکەدا ئاماژە بە رەتکردنەوەی هەریەک لە خالید تەوەکولی، بەربژێری سەقز و بانە و عەبدوڵڵا سوهرابی، بەربژێری مەریوان کراوە، کە دەنگدانەوەیەکی زۆری هەبووە لەسەر ئاستی پارێزگای سنە و تێیدا هاتووە "خالد تەوەکولی لەچوارچێوەی یاسای کۆماری ئیسلامیی ئێران خۆی کاندیدکردووە و هەبوونی ئەو لە پەرلەمانی ئێران خزمەت بە وڵات دەکات. کاندید بوونی عەبدوڵڵا سوهرابیش بەهەمانشێوە ئەگەر بچێتە پەرلەمان لەبەرژەوەندی ئێرانە و بوونی ئەو دەبێتە هۆکارێک بۆ زیاتر بەشداریکردنی خەڵک لە دەنگدانەکاندا لە مەریوان و سەراوا و هەموو پارێزگای سنەدا".

ئەنجوومەنەکە داوا لە بەرپرسان و بەتایبەت پارێزگاری سنە دەکات کارێک بکەن و مافی ئەو بەربژێرانە بەهەدەر نەچێت. لە کۆی هەزار و 621 بەربژێر بۆ بەدەستهێنانی 45 کورسی حەوت پارێزگای رۆژهەڵاتی کوردستان، هەزار و 428 بەربژێر شیاوبوونیان پەسەندکرا و 193 کەسیش یان شیاوبوونیان رەتکراوەتەوە یان خۆیان کشاونەتەوە، 5 کەس لەو بەربژێرانەی کە رەتکراونەتەوە، بەربژێری بەرەی یەکگرتووی کوردن.

خالد تەوەکولی، چالاکڤانی مەدەنی و بەربژێری رەتکراوەی هەڵبژاردنی پەرلەمانی ئێران پێشتر بە(تۆڕی میدیایی رووداو)ی راگەیاندبوو "بەفەرمی لەلایەن فەرمانداری شاری سەقزەوە بە نامەیەک ئاگادارکراوینەتەوە کە بەپێی بەندی سێی ماددەی سێ، شیاویەتیمان رەتکراوەتەوە، چونکە بەپێی ئەو یاسایە، ئەو کەسانەی هەواداری پارتێکی سیاسی نایاسایین دەبێ رەتبکرێنەوە".

تەوەکولی گوتتبووشی "منیش بە بیانووی ئەوەی لایەنگر یان هەواداری پارتێکی سیاسیم رەتکراومەتەوە، بەڵام هیچ بەڵگەیەکیان لەسەرم نییە و، منیش دەتوانم لە داهاتوودا سکاڵای یاسایی تۆمار بکەم و داوای بەڵگەیان لێبکەم، چونکە تاوەکو ئێستا هیچ مەحکومییەتێکی سیاسیم نەبووە، ئەوە تەنیا بیانوویەک بووە".















رووداو