لە دیدارێكی تایبەتدا بۆ گۆڤاری گوڵان تێدگەلێن كارپنتەر جێگری سەرۆكی ئامۆژگای كاتۆ گوتى: هەر لەمێژە ڕۆژهەڵاتی ناوەڕاست گۆڕەپانێكی جیۆپۆلیتیكییە بۆ زلهێزەكان لەسەر حیسابی نەهامەتی دانیشتووانە جیاوازەكانی ناوچەكە، باشترین شت كە ولایەتە یەكگرتووەكان و رووسیا و هێزە دەرەكییەكانی دیكە بیكەن، ئەوەیە كە واز لە گەلانی ڕۆژهەڵاتی ناوەڕاست بێنن، خۆیان كێشەكانیان چارەسەر بكەن، یان بە دەستێوەردانێكی كەمەوە هاوكارییان بكەن.

تێدگەلێن كارپنتەر هەروەها گوتی: داعش نەدەبووە هەڕەشەیەكی جیهانی ئەگەر ویلایەتە یەكگرتووەكان و هاوپەیمانەكانی بڕیاریان نەدایە دەستوەربدەنە ململانێی ناوچەكانەوە. ئەجێندای داعش لە بنەڕەتدا خۆی لە ناوچەكەدا قەتیس دابوو. تا زیاتر ویلاتە یەكگرتووەكان و هاوپەیمانەكانی دەستێوەردان بكەن، ئەوا زیاتر داعش وڵاتەكانیان دەكاتە ئامانج.

شایانی باسە كارپنتەر هەروەها گوتی: داعش دەركەوتەیەكی ململانێی دەسەڵاتی ناوچەیی شیعە و سوننەكانە. كێشە بونیادی و ڕوونترەكە ئەوەیە كە سنوورە سیاسییەكانی ئێستای ڕۆژهەڵاتی ناوەڕاست بە شێوەیەكی زۆر لەلایەن هێزە كۆڵۆنیاڵە ئەوروپییەكانەوە سەپێندراوە و لە گۆشەنیگای ئایینی، یان مۆڕاڵییەوە مانایەكی نییە. دەرئەنجامی سەقامگیرتر لەوانەیە ئەوە بێت سووریا و عێراق هەڵبوەشێندرێتەوە بۆ قەوارەی نوێ كە لەگەڵ واقیعە ئایینی و نەژادییەكاندا بگونجێت. ئەمەش كوردستانی گەورە و قەوارەی نوێی عەرەبە سوننەكان لە ڕۆژهەڵاتی سووریا و ڕۆژئاوای عێراق و قەوارەیەكی بچووكتر بۆ هەموو شیعەكانی عێراق و دەوڵەتێكی بچووك بۆ مەسیحی و دروزەكان لە ڕۆژئاوای سووریا لەخۆ دەگرێت. گۆڕانكارییەكی ئاوا ئاسۆكانی سەقامگیرییەكی درێژخایەن دەخاتە بەردەست.

لە درێژەی قسەكانیدا تێدگەلێن گوتی: دوودڵی كۆمەڵگەی كوردی بۆ مانەوە وەك بەشێك لە ناو دەوڵەتی تەواو لاوازی عێراق قابیلی تێگەیشتنە و ڕێگری سەرەكی بۆ ئەم گۆڕانە ناڕازیبونی بەردەوامی ئێران و توركیایە بۆ دەوڵەتێكی سەربەخۆی كوردی لە عێراق، یان لە سووریا. بەڵام دەتوانین بڵێین كاتی ئەوە هاتووە ولایەتە یەكگرتووەكان و هاوپەیمانەكانی لە ناتۆ بە ڕوونی بڵێن كە هاوپەیمانیی ناتۆ چیتر ناڕازی نییە لە درووستبوونی كوردستانی سەربەخۆ و ئەگەر توركیاش دەیەوێت وەك ئەندامی ناتۆ بمێنێتەوە (لەگەڵ گرنگی سودە ئەمنیەكانی ئەم بەئەندامبوونە كە لەخۆیدا هەڵیگرتووە)، ئەوا دەبێت لە ڕێگرییەكانی بۆ گۆڕانكاری واز بێنێت.

لە كۆتایی قسەكانیدا كارپنتەر گوتی: شەڕەكەی شنگال دوو شتی یەكلاكردەوە. یەكەمیان ئەوەیە پێشمەرگە بەتواناترین و پڕحەماسترین هێزی دژە داعشن لەناوچەكەدا. دووەمیشیان ئەوەیە كە تێكشكانی داعش پێویستی بەوەیە لە سەردەستی یاریزانێكی ناوچەیی ئاوا بێتە ئاراوە، نەك هێزە دەرەكییەكان.


بۆ خوێندنەوەی ئەم بابەتە لە گۆڤاری گوڵان ژمارە(1055)