وەزارەتی كارەبای حكومەتی هەرێمی كوردستان داواكارییەك ئاراستەی هاونیشتمانییان دەكات و داوایان لێدەكات هاوكاربن لە كەمكردنەوەی زیاد بەكارهێنانی كارەبا، بۆئەوەی بتوانن ئەو بڕە كارەبایەی لەبەردەستدایە بەشێوەیەكی رێكوپێك دابەشی بكەن.

لە راگەیێندراوێكدا كە وێنەیەكی بۆ تۆڕی میدیایی رووداو نێردراوە، وەزارەتی كارەبا چەند هۆكارێكی كەمی كارەبای خستوونەتەڕوو، لەوانە هاتنی شەپۆلێكی سەرماو سۆڵە و هەڵكشانی خواستی بەكارهێنانی كارەبا بۆ 4800 مێگاوات كارەبا، لەكاتێكدا ئێستا بڕی بەرهەمهێنانی كارەبا دەگاتە 2900 مێگاوات. هەروەها بەهۆی نەبوونی سووتەمەنییەوە ناتوانرێت 1100 مێگاوات كارەبای دیكە بەرهەمبهێنرێت.

كەمبوونەوەی سووتەمەنی و قەیرانی دارایی و ئابووری هەرێمی كوردستان دوو هۆكاری دیكەی كەمی كارەبان، چونكە وەزارەتی كارەبا بودجەی پێویستی لەبەردەستدا نییە بۆ چاككردنەوەی وەرزی وێستگەو تۆڕەكانی كارەباو جێبەجێكردنی پڕۆژەكانی پێویست.

هەروەها هاتنی زیاتر لە ملیۆنێك و 80 هەزار ئاوارە لە هەرێمی كوردستان بارگرانییەكی زیاتری خستووەتە سەر وەزارەتی كارەبا، بۆیە وەزارەت داوا لە هاونیشتمانیان دەكات هاوكاری حكومەت بكەن بە كەمكردنەوەی بەكارهێنانی كارەبا.











رووداو