بەڕێوەبەری ئاساییشی شنگال دەڵێت، لە ماوەی ئەم حەفتەیەدا كە شنگال رزگار كراوە،‌ 30 تۆن مینی چێنراو پووچەڵ كراوەتەوە و، خێزانێكیش لە چنگى تیرۆریستانی داعش رزگار كراوە.

( قاسم سمۆ) بەڕێوەبەری ئاساییشی شنگال، بە ماڵپەری فەرمیی پارتیی دیموكراتی كوردستانی گوت: لە ماوەی ئەم حەفتەیەدا‌ كە شنگال رزگار كرایەوە، ژمارەیەكی زۆر مینی چێنراو لەلایەن تیمی ئەندازیاریی هەڵگرتنەوەی مینەوە پووچەڵ كراونەتە‌وە و بەردەوامیشن لەسەر ئەركەكانیان، دەیشتوانم بڵێم تا ئێستا 30 تۆ‌ن مین لە شنگال پووچەڵ كراوەتەوە،‌ چونكە لە یەك ئۆتۆمبێلدا 5 تۆن مین هەبوو و لە كارگەیەكی دروستكردنی مینی داعشیش پێدەچوو 7 بۆ 8 تۆ‌نی تێدا بێت، ئەمە جگە لەوەی كە رۆژانە لە دەوروبەری شنگال لەناو دەبرێت، تەنیا لە دەروازەی شنگال لە باكوور، تونێلێكی تیرۆریستانی داعش دوێنێ دۆزرایەوە كە درێژاییەكەی 20 مەتر بوو و بە تەواوی مینڕێژ كرابوو كە ‌كاتەكەیشی دانرابوو و 12 سەعات و 5 خولەكی مابوو بتەقێتەوە، بەڵام لەلایەن تیمی ئەندازیاریی مینەوە پووچەڵ كرایەوە".

(سمۆ) گوتیشی: "لە ماوەی ئەم حەفتەیەدا كە شنگال رزگار كراوە، خێزانێك كە لە دایكێك و سێ منداڵ پێك هاتوون، دوێنێ هاتنە رزگاركردن كە لە سووریاوە گەییشتنە لای هێزەكانی پێشمەرگە،‌ ئەمەیش یەكەمین خێزانە دوای رزگاركردنی شنگال لە چنگ تیرۆریستانی داعش ڕزگار كراوە".

















KDP.info-