كاپتن تشانس ماكگۆرگ ئه‌فسه‌ری هه‌واڵگری ئه‌مریكا بۆ رۆژنامه‌نووسان له‌ به‌غدا ڕایگه‌یاند، هێزه‌كانی پێشمه‌رگه‌ی كوردستان سه‌ركه‌وتنی گه‌وره‌یان له‌ كۆنتڕۆڵكردن و ڕزگاركردنی شنگال به‌ده‌ست هێناوه‌.

له‌لایه‌كی دیكه‌وه‌، كۆلۆنێل ستیڤ وارن گوته‌بێژ به‌ناوی هێزه‌كانی هاوپه‌یمانی نێوده‌وڵه‌تی ڕایگه‌یاند، كۆنترۆڵكردنی ڕێگای سه‌ره‌كی و خێرای 47 له‌لایه‌ن هێزه‌كانی پێشمه‌رگه‌ی كوردستان، پرۆسه‌یه‌كی گرنگه‌ بۆ دابڕان و پچڕاندنی هاوكارییه‌كانی تیرۆریستانی داعش له‌ سوریاوه‌ بۆ عێراق به‌تایبه‌تی به‌ستنه‌وه‌ی موسڵ به‌ ڕه‌قه‌.

هاوكات بیته‌ر كۆك گوته‌بێژی وه‌زاره‌تی به‌رگری ئه‌مریكا (پنتاگۆن) بۆ رۆژنامه‌نوسان ڕایگه‌یاند، هاوكاری و هه‌ماهه‌نگی باشیان هه‌یه‌ له‌گه‌ڵ هێزه‌كانی پێشمه‌رگه‌ی كوردستان له‌ڕێگه‌ی ڕاوێژكاره‌ سه‌ربازییه‌كان له‌سه‌ر چیای شنگال بۆ پێكانی ئامانجه‌كانیان له‌ ڕێگه‌ی هێرشه‌ ئاسمانییه‌كانه‌وه‌ بۆ سه‌ر تیرۆریستانی داعش.