سەرۆکایەتیی هەرێمی کوردستان بەیاننامەیەک لەسەر بۆردوومانکردنی بارەگاکانی پەکەکە لە باشووری کوردستان لەلایەن تورکیا بڵاودەکاتەوە و، تێیدا ئاماژە بە پەیوەندی تەلەفۆنیی نێوان مەسعود بارزانی، سەرۆکی هەرێمی کوردستان و داوودئۆغڵو، سەرۆکوەزیرانی تورکیا دەکات کە باسی پەرەسەندنی رەوشەکەیان کردووە.

وەک لە بەیاننامەکەدا هاتووە بارزانی لەرێگەی تەلەفۆنەوە بە داودئۆغڵوی راگەیاندووە کە " ساڵانێک گفتوگۆکردن باشترە لە کاتژمێرێک شەڕکردن".

دەقی بەیاننامەکە..

شەوی رابردوو سوپای تورکیا بارەگاکانی PKKـی لەچەند ناوچەیەکی هەرێمی کوردستان بۆمبباران کرد، دوای ئەو بۆمببارانکردنە ، کاژێر٩:٣٠ خولەکی پێشنیوەڕی ئەمڕۆ شەممە ٢٥ـی٧ـی٢٠١٥، بەڕێز ئەحمەد داوودئۆغڵو، سەرۆکوەزیرانی تورکیا، لە رێگەی تەلەفۆنەوە پەیوەندیی بە بەڕێز مەسعود بارزانی سەرۆکی هەرێمی کوردستانەوە کرد و بەدرێژی باسی رەوشەکەی کرد و هۆی گەییشتنی دۆخەکەی بۆ ئاستی ئەو پەرەسەندنەی ئێستا ڕوونکردەوە.

لە بەرانبەردا سەرۆک بارزانی دڵگرانیی خۆی نیشان دا کە ڕەوشەکە گەیشتۆتە ئەم ئاستە مەترسیدارە و جەختیشی کردەوە کە زۆر داوایان کرد کێشەکان نەگەیەندرێنە ئاستی گرژیی زیاتر، چونکە ئاشتی تاکە ڕێگەی چارەسەری کێشەکانە و ساڵانێک گفتوگۆ باشترە لە یەک سەعات شەڕکردن، بۆیە هەرێمی کوردستان هەموو هەوڵێک دەدات ڕەوشەکە لەوە زیاتر تەشەنە نەکات و گەڕانەوە بۆ پرۆسەی ئاشتی باشترین ڕێگەیە بۆ چارەسەر.

سەرۆک بارزانی هەروەها تەئکید دەکاتەوە کە پێشتر هەموو هەوڵێکی خۆی بۆ سەرگرتنی پرۆسەی ئاشتی لەگەڵ هەموو لایەنەکان خستۆتەگەڕ و ئێستاش هەرچی لە توانایدا بێت بۆ نەهێشتنی ئەم گرژییە دەیخاتەگەڕ و ئومێدەوارە هەموو لایەک بگەڕێنەوە بۆ بنەماکانی پڕۆسەی ئاشتی.

سەرۆکایەتیی هەرێمی کوردستان
٢٥ـی٧ـی٢٠١٥