ئەندامێكی ئەنجوومەنی پارێزگای سلێمانی ئاشكرای دەكات، وەزارەتی سامانە سروشتییەكان سێ پاڵاوگە لە سنووری سلێمانی و هەولێر و دهۆك دروست دەكات، بەڵام زۆر گرنگە پاڵاوگەیەکیش لەو گەرمیان پڕ نەوتەدا دامەزرێنن؛ داواكارییشیان پێشكەش كردووە و داوای پشتگیری لە لایەنە پەیوەندیدارەكان دەكەن.

(د. غالب محەمەد) سەرۆكی لیژنەی پیشەسازی و وزە و سامانە سروشتییەكان لە ئەنجوومەنی پارێزگای سلێمانی بە ماڵپەڕی فه‌رمی پارتی دیموكراتی كوردستانی ڕاگەیاند: "پڕۆژەیەكی ئاراستەی ئەنجومەنی پارێزگای سلێمانی و پەرلەمانی كوردستان كردووە بۆ دروستكردنی پاڵاوگە لە گەرمیان و، بەو مەبەستەش داوا لە هەموو لایەنە سیاسییەكان و ڕێخراوەكانی گەرمیان دەكات پشتی بگرن، چونكە بابەتێكی زۆر گرنكە و پەیوەندیی بە هەموو گەرمیانەوە هەیە."
غالب محەمەد گوتیشی: "ئێستا وەزارەتی سامانە سروشتیەكان بڕیاری داوە پارێزگای دهۆك، سلێمانی و هەولێر، هەر کامێکیان و، پاڵاوگەیەکی لێ دروست بکرێت. هەڵبەت شوێنێکی گرنگی وەکو گه‌رمیانیش، پێویستە گورجوگۆڵ پاڵاوگەیەکی بۆ دروست بکرێت."
ئەو ئەندامەی ئەنجوومەنی پارێزگای سلێمانی، ئا وەها باس گرنگییەکەی گەرمیان دەکات:
"یەكەم، گەرمیان نەوتەڵانی بەپیتی لێیە؛ نزیكەی 15 تا 20ملیار بەرمیل نەوتی خاوی هەیە؛ نەوتەكەیشی نەوتێكی سووك و شیرینە و لە هەموو ڕویەكەوە گونجاوە. چیاسورخ، شاكەل یەك، شاكەل دوو، كوردەمیر و، گەرمیان، هەرپێنجەکەیان نەوتەڵانیان لێ دۆزراوەتەوە؛ هەڵبەت نەوتەڵانی نەوتخانەی سنووری خانەقینیش خراوەتە سەر ئیدارەی گەرمیان.
دووەم: گەرمیان دەشتاییە و، جێوڕێی زۆرە بۆ دروستكردنی پاڵاوگە؛ خەڵکەکەیش دەستی كار و توانای مرۆیییان زۆرە.
سێیەم: گەرمیان 550هەزار کەس زایاتریشی لێ دەژیێت؛ خەرجی گازوایل و بەنزین و نەوتی سپی و بەرهەمە نەوتییەكانی دیكەیشیان زۆرە.
چواره‌م: نەوتەڵانەکانی گەرمیان نزیکن لەیەکەوە و، ئاسان دەبەسرێن پێکەوە، خەرجی دانانی لوولەنەوت زۆر نابێت.
پێنجه‌م: خەڵکی گەرمیان، ئەنفال کراون.
رونیشیكردەوە، داواكارییەكان بە پاڵپشتی ئیدارەی گەرمیانە و ئەو ئیدارەیەش هاوڕایە لەگەڵ دروستكردنی پاڵاوگەیەك لە سنوورەكە و بە كارێكی گرنگی دەزانێت بۆ ناوچەكە و، لەبەر ئەو هۆكارانەش داواكارە لە ئەنجومەنی پارێزگایی سلێمانی پشتی ئیدارەی گەرمیان بگرن بۆ دانانی پاڵاوگە لە سنوورەكەدا؛ ئەو كارە باری پارێزگای سلێمانییش سووک دەکاتەوە.