سکرتێری مەکتەبی سیاسی پارتی دیموکراتی کوردستان رایگەیاند، کە ناکرێ دەستووری هەرێمی کوردستان رێزی بۆ بۆچوونی زۆرینەی خەڵک نەبێت.

فازڵ میرانی، سکرتێری مەکتەبی سیاسی پارتی، لە چاوپێکەوتنێکدا لەگەڵ ئاژانسی ئەنادۆڵ، رایگەیاندووە، کە ”هەوڵی كەمكردنەوەی كورسی كۆتاكان لە پەرلەمان ئێمەی شۆك كردووە“ و ئاماژە بەوەدەکات، کە ئەو هەوڵە پاشەكشەیە لە دیموكراسی و ”قوربانیدان“ی ئەو نەتەوانە.

فازڵ میرانی پێیوایە بوونی تورکمان و کلدۆ ئاشوورییەکان لە هەرێمی کوردستان ”ئێمە لە دەرەوە جوانتر دەكات و دەبێتە بەڵگەیەك بۆ پشتڕاستكردنەوەی ئەوە بانگەشانەی دەیكەین بۆ پەرەپێدانی دیموكراسی“.

سکرتێری مەکتەبی سیاسی پارتی داوای ئەوەشدەکات، کە بەهۆی ئەوەی ئەو نەتەوانە ”باج و قوربانییان“ لە رێگەی ئەو وڵاتەداوە، ”پێمان باشە رێژەی کۆتاکان زیادبکرێ“.

فازڵ میرانی لەبارەی مشتومڕی دەستووری هەرێمی کوردستان و کردنی ئایینی ئیسلام بە یەکێک لە سەرچاوەکانی، باس لەوەدەکات، کە ”زیاتر لە 90 لەسەدای خەڵكی ئێمە مسوڵمانن و ناكرێت دەستوورێك لە وڵاتێكی زۆرینە مسوڵمان ڕێزی بۆ بنەماكانی سەرەكی بۆچوونی خەڵك نەبێت“

سکرتێری مەکتەبی سیاسی پارتی هەڵوێستی حزبەکەی لەوبارەیەوە دەخاتەڕوو و دەڵێت، ”لەگەڵ ئەوەداین كە ئیسلام یەكێك لە سەرچاوەكانی گرنگی دەستووری ئێمە بێت“.

























باسنیوز