وته‌بێژی مه‌كته‌بی سیاسی یه‌كگرتووی ئیسلامی كوردستان رایده‌گه‌یه‌نێت، پێویسته‌ ئه‌وانه‌ی به‌رپرسیاری سیاسی و ئیداری هه‌رێمیان له‌ئه‌سۆدایه‌ وریاتر مامه‌ڵه‌ بكه‌ن و ئه‌وله‌ویاتی ئه‌م قۆناغه‌ مه‌ترسیداره‌یان لێ تێكنه‌درێت، چونكه‌ هێشتا ده‌رفه‌تی سازان و پێكگه‌یشتن هه‌یه‌.

پێگه‌ی فه‌رمی یه‌كگرتووی ئیسلامی له‌ زاری هیوا میرزا سابیر، وته‌بێژی مه‌كته‌بی سیاسی حزبه‌كه‌یه‌وه‌ بڵاویكردووه‌ته‌وه‌: بارودۆخی سیاسی زۆر ناسك و هه‌ستیار و ئاڵۆزه‌و كێشه‌كان فره‌ ره‌هه‌ندو فره‌ جه‌مسه‌رن و ده‌یان هاوكێشه‌ی دژبه‌یه‌ك له‌م وڵات و هه‌رێم و ناوچه‌دا كارده‌كه‌ن.

له‌به‌شێكی تری لێداونه‌كه‌یدا رایگه‌یاندوه‌: "بۆیه‌ ده‌خوازێت ئه‌وانه‌ی به‌رپرسیاری سیاسی و ئیداری هه‌رێمیان له‌ئه‌سۆدایه‌ (پێنج حزبه‌كه‌) وریاتر مامه‌ڵه‌ بكه‌ن و ئه‌وله‌ویاتی ئه‌م قۆناغه‌ مه‌ترسیداره‌یان لێ تێكنه‌درێت و ئه‌وه‌ی ئه‌م چه‌ند رۆژه‌ی پێشتر روویدا نه‌بێته‌ مایه‌ی لێك ترازان و هه‌ڵوه‌شانه‌وه‌ی ئه‌وه‌ی له‌م ماوه‌یه‌دا بینامان كردووه‌".


ئاماژه‌شه‌ به‌وه‌ ده‌كات: "له‌مساته‌ وه‌خته‌دا پێویسته‌ هه‌موو راگه‌یاندنه‌كان هه‌ستیارانه‌تر وبه‌ربرسیارانه‌ مامه‌ڵه‌ بكه‌ن و له‌ خزمه‌تی یه‌كڕیزی وته‌بایی وچاره‌سه‌ری كێشه‌كاندا له‌ڕێگه‌ی دانووسان و حیواره‌وه‌ بن، نه‌ك گه‌وره‌ كردنی جیاوازییه‌كان و یه‌كتر تۆمه‌تباركردن".

له‌ كۆتاییشدا وته‌بێژه‌كه‌ی یه‌كگرتوو راشیگه‌یاندوه‌: "هیوا دارم هه‌موومان پێكه‌وه‌ بگه‌ینه‌ باشترین چاره‌سه‌ر و هه‌رده‌م ئه‌وه‌مان له‌به‌رچاوبێت كه‌ شه‌ڕی داعش و ئاسه‌وارو ده‌رهاویشته‌ی رۆژانه‌ی و كێشه‌ی مووچه‌و بوجه‌ و بێكاری و هه‌ژاری و كێشه‌كانمان له‌گه‌ڵ به‌غدا و ده‌یان كێشه‌ی تر كه‌به‌رۆكی پێگرتووین و زۆری تریش به‌ڕێوه‌یه‌ وخه‌ڵكی بۆ چاره‌سه‌ریان چاوه‌ڕێی حكومه‌ت وپه‌رله‌مان وسه‌رۆكایه‌تی هه‌رێمن بۆیه‌ زۆر مه‌ترسیداره‌وبێ هیوایی رووده‌دات كه‌ ئه‌وان ببنه‌ مایه‌ی كێشه‌و مه‌ترسی".






















خه‌ندان