بەپێی زانیارییەکانی باسنیوز گەنجێکی کوردی خەڵکی ناوچەی “شامات”ی سەر بە شاری مەهابادی رۆژهەڵاتی کوردستان لە نەخۆشخانەی شاری مەراغە بەهۆی لێدانی دەرزی گیانی لەدەست داوە.

ئەو گەنجە کوردە ناوی “زانیار رادوەند” و تەمەن 20 ساڵ بووە و پاش ئەوەی کە تووشی زگچوون و نەخۆشیی گەدە دەبێت دەبرێتە نەخۆشخانەی “عەباسی”ی شاری میاندواو.

پاش ئەوەی ئەو گەنجە لەنەخۆشخانەی عەباسی چارەسەری پێویست وەرناگرێت سەردانی پزیشکەکانی شاری مەراغە لە پارێزگای تەورێز دەکات و دەخرێتە ژێر چاودێرییەوە.

بە گوتەی برایەکی زانیار ئەو بە هیندێ دەرزی و دەوا حەساسیەتی هەبووە و هەمیشەش نووسراوەی تایبەتی بەو عیلاجانە لە گیرفانیدا بووە و سەرەڕای ئاگادار کردنەوەی پزیشکەکان، بەڵام ئەوان دەرزیی لێدەدەن.

ئەو هاووڵاتییە گوتوویەتی کاتێک ئەو دەرزییەیان لە زانیار دا رەنگی سپی هەڵگەڕا و تووشی تەنگە نەفەسی هات و دواتریش دڵی لە لێدان کەوت.

دەگوترێت نەخۆشخانەی شاری مەراغە هۆکاری گیان لەدەستدانی ئەو گەنجەی بۆ نەخۆشی دڵی گەڕاندووەتەوە و ئەوەش لە حاڵێکدایە کە بنەماڵەکەی دەڵێن کوڕەکەیان نەخۆشی دڵی نەبووە.






























باسنيوز