شەوی رابردوو چەکدارانی داعش لە چەند میحوەرێکەوە خۆیان ئامادەکردبوو هێرش بکەنە سەر هێزەکانی پێشمەرگە، بەڵام پێش ئەوەی پلانەکەیان سەربگرێت هێرشیان کرایە سەر و تێکشکێندران.

دکتۆر کەمال کەرکووکی، بەرپرسی میحوەری رۆژئاوای کەرکووک لە لێدوانێکدا گوتی:" شەوی هەینی لەسەر شەممە 15-5-2015 چەکدارانی داعش لە ئامادەکاریی بوون لە میحوەرەکانی مەحگوور و گوبەیبە لە رۆژئاوای کەرکووک بۆ هێرشکردنە سەر سەنگەرەکانی پێشمەرگە، بەڵام پێشمەرگە دەسپێشخەری کرد و بە هاوکاری فڕۆکە جەنگییەکانی هاوپەیمانان هێرشمان کردە سەریان و پلانەکەیان شکستیهێنا".

کەرکووکی هەروەها گوتی "چەکدارانی داعش ‌هێزیان لە چەند شوێنێکەوە هێنابوو، بەتایبەت لە موسڵ و حەویجەوە و بەنیاز بوون بەو چەکە نوێیانەی کە لە سوپای عێراق دەستیان کەوتبوو و دەگوترێت بە هەڵە خراوەتە خوارەوە بۆ تیرۆریستانی داعش، هێرشێکی بەرفراوان ئەنجام بدەن، بەڵام ئێمە زانیاری پێشوەختمان هەبوو و توانیمان شکستێکی گەورەیان پێبهێنین و فڕۆکە جەنگییەکان هەموو کەرەستە و ئامێرەکانیان گڕ تێبەردەن و تێکیانبشکێنن".









رووداو