لە خۆپیشاندانەکانی دوێنێی شاری سەردەشتی رۆژهەڵاتی کوردستاندا، ٣٠ کەس دەستگیرکراون، کە سێیان ژنن. سەرچاوەیەک لە سەردەشتەوە بە رووداوی راگەیاند، ئەم بەیانییە بنەماڵەی ئەو خۆپیشاندەرانەی دەستگیرکراون لەبەردەم ئیدارەی ئیتڵاعاتی سەردەشت کۆبوونەتەوە و داوای ئازادکردنی گیراوەکانیان کردووە.

ئێوارەی رۆژی شەممە 9-5-2015 بەسەدان هاونیشتمانی شاری سەردەشت لە مەیدانی سەروچاوێ گردبوونەوەیەکیان سازکرد و بەرەو مەیدانی سەڵاحەدین ئەیوبی خۆپیشاندانیان سازدا. بەڵام هێزە ئەمنییەکانی ئێران رووبەڕوویان بوونەوە و ئاڵۆزی لێکەوتەوە و ٣٠ کەس لەلایەن هێزە ئەمنییەکانەوە دەستگیرکران، کە سیانیان ژنن و تائێستا لە ئیدارەی ئیتڵاعاتی شاری سەردەشت دەستبەسەرن.

هاوکات ناوەندی بەرگری مافی مرۆڤی کوردستان لە راگەیێنراوێکدا ،، رایگەیاند : لە شارەکانی سنە ، سەقز ، بۆکان و مەریوان ژمارەیەکی زۆر پۆلیس و هێزی ئەمنی بڵاوکراونەتەوە، هەروەها لە شاری مهابادیش بەبڕیاری ئیدارەی ئیتڵاعاتی شارەکە هێڵی ئینتەرنێت بڕاوە".

هەروەها بڕیارە ئەمڕۆ لە هەریەک لە وڵاتانی نەرویج و سوێد خۆپیشاندانێک بۆ پاڵپشتی لە خۆپیشاندەرانی مهاباد بەڕێوەبچێت و کوژرانی فەریناز خوسرەوانی کچە کوردی کارمەندی هۆتێل تارا ئیدانە بکرێت.

دوای رووداوی گیانلەدەستدانی کچە کارمەندی هۆتێلی تارا لە مهابادی رۆژهەڵاتی کوردستان، تا ئێستا چەندین خۆپیشاندان و گردبوونەوەی ناڕەزایی لە سەرجەم پارچەکانی کوردستان ئەنجامدراوە.










روداو