لە دیدارێكی تایبەتدا بۆ گۆڤاری گوڵان پرۆفیسۆر ماكس ئەبراهامۆ گوتی: هەمیشە عێراق- ئەوەندەی من لەبیرمە كێشەی حكومڕانی هەبووە، چونكە هیچ كاتێك نەبووە خەڵك بە یەكڕیز پشتیوانی سەركردەیەك بكەن. بۆ ماوەیەكی دوورودرێژ سەددام لە دەسەڵاتدا بوو، بەڵام بە دڵنیاییەوە نوێنەرایەتی بەرژەوەندی بەشی زۆری عێراقیەكانی نەدەكرد. ئێستاش مالیكی لە دەسەڵاتدایە، كە بە شێوەیەك لە شێوەكان خاوەنی پشتیوانی سیاسی نییە لەلایەن خەڵكی عێراقەوە، كەواتە بۆ چەندین دەیەیە كە حكومڕانی لە عێراقدا ناسەقامگیر بووە. ئەمەش پێوەندی بەو كێشەیەوە هەیە كە فرەییەكی زۆر لە وڵاتی عێراقدا هەیە، لەبەر ئەوە زۆر زەحمەتە سەركردەیەك هەبێت كە پشتیوانی بكرێت لەلایەن سەرجەم توێژەكانی كۆمەڵگەی عێراقیەوە. بە دڵنیاییەوە بارودۆخەكە لە سەددامەوە بۆ مالیكی بریتی بوو لە گۆڕانی پشتیوانیكردنەكە لە سوننەكانەوە بۆ شیعەكان. پێموایە بە راددەیەكی گەورە ناسەقامگیری لە عێراقدا شتێكی حەتمیە ئەویش بەهۆی ئەو دابەش بوونەی لە نێوان هاووڵاتیانی عێراقدا هەیە، لەگەڵ بوونی رەوت و تەوژمی تایەفەگەری..

هەروەها لە پرسیارێكی گۆڤاری گوڵاندا كە ئایا داگیركردنی ئەم شارانە لەلایەن تیرۆریستانەوە شتێكی چاوەڕوان كراوبوو؟ ماكس ئەبراهامۆ گوتی: لە راستیدا ئەمە تەواو جێی سەرسوڕمانی بوو- بە هیچ شێوەیەك چاوەڕوان كراو نەبوو-، بە هەزارەها گرووپی تیرۆریستی هەبوون لە مێژووی هاوچەرخەدا، لە دوای كۆتایی ساڵانی شەستەكانی سەدەی رابردوەوە، كە ویستویانە لە رووی سیاسییەوە گەشە بكەن، بەڵام هەرگیز نەمبینیوە ئەوان بەرەوپێشچوونی سیاسی بەدەست بهێنن و شاری گەورە بگرنەدەست و ببنە هەڕەشە بۆ سەر حكومەت.

شایانی باسە ئەبراهامۆ گوتی: شێوازی كۆتایی هاتنی گرووپێكی تیرۆریستی، و شێوازی داكشانی هەڕەشەی تیرۆریستی لەسەر دەستی حكومەت روونادات، واتە ئەوە حكومەت نییە كە بە كوشتنی سەركردەكەیان یان بە گرتنی سەرجەم ئەندامەكانیان یاخود بە كوشتنی ئەندامەكانیان كۆتاییان پێ بهێنێت، بەڵكو ئەوەی روودەدات ئەوەیە گرووپە تیرۆریستیەكە خۆی خۆی دەكوژێت، چونكە كارەكان لە سنور تێدەپەڕێت و خەڵكانێكی زۆر دەكوژێت و خۆی لە خەڵكەكە دابڕێت. ئێوە ئەم حاڵەتە باش دەزانن، چونكە لە عێراقدا ئەوە خەڵكەكە بوو كە چەند ساڵێك پێش ئێستا دژی ئەل قاعیدە وەستایەوە، ئەمە باشترین گرەوە بۆ كۆتایی هێنان بە گرووپە تیرۆریستییەكان لە عێراق.
ماكس هەروەها دەڵێ: سیاسەتی دەرەوەی ئۆباما ناجێگیرە، لەسەرەتادا من لە سیاسەتی ئەمریكا تێگەیشتم لەبارەی بەرەنگاربوونەوەی تیرۆریزمەوە، لە شەڕی دژە تیرۆردا ئێمە رامانگەیاند كە دژی هەموو جۆرە تاكتیكێكی تیرۆریزمین، چونكە خەڵكی بێتاوانی تێدا دەكوژرێت. چونكە ئەو كەسانە هەر كێیەك بن و هەر پاساوێكیشی بۆ بهێنرێتەوە ئەوا ئەمە هەڵەیە، من لەوە تێگەیشتم. بەڵام لە پێوەندیدا بە سوریاوە ئەوا سیاسەتی دەرەوەی ئەمریكا لە ئاستی تیرۆردا رەق هەڵات.

بۆ خوێندنەوەی ئەم بابەتە لە گۆڤاری گوڵان ژمارە (981)