میرێ ئێزدیان سەركەفتنا لیستا برایەتی و پێكڤەژیان پیرۆز كر
میر تحسین بەگ میرێ ئێزدیان ل رێ و رسمێن بەستنا گۆنگرێ ئێكێ یێ بنگەهێ لالش – ئەلمانیا ل باژارێ بیلیفیلد، پەیڤەك پێشكێشكر و تێدا سەرەرای پێشتەڤانیا خوە بۆ بنگەهێ لالش دەربری، بال كشاندە لسەر رەوشا نەها یا كو كوردێن ئێزدی دناڤرە دەرباس دبن و گۆت: كوردێن ئێزدی دخزمەتا كوردستانێ دەنە و ئەركێ خوە جێبەجێكرن ل هەلبژارتنێن پارێزگەها نەینەوا و دەنگێن خوە دانە لیستا برایەتی و پێكڤەژیان یا كوردستانی ومیر ئەو سەركەفتنا لیستا ناڤهاتی پیرۆز كر .
وەك ئاماژەیەك بۆ پۆستێن پارێزگەها نەینەوا و رێڤەبرنا پارێزگەهێ، میرێ ئێزدیان گۆت: ژ سەركردایەتیا سیاسیا كوردستانی داخواز دكم، وێ رێژەیا مەزنا دەنگێن كوردێن ئێزدی دناڤ لیستێ دا راچاڤبكن.
دهەمان بیاڤدە سەرۆكێ هلبژارتی یێ بنگەهێ لالش – ئەلمانیا خەلات شێخ مراد پیرۆزبایێن ئەندام و كادرێن كورددێن ئێزدی یێن دناڤ بنگەهیدا پێكێشی لیستا برایەتی و پێكڤە ژیان كر، سۆپاسیا هەمی دەنگەدەرێن كوردێن ئێزدی یێن كو دەنگ ب لیستا كوردستانی داین كر، گۆت ئەم پشتەڤانیا پەیڤا میرێ ئێزدیان دكن .
لگۆر پەیرەو و پرۆگرامێ بنگەهێ لالش – ئەلمانیا، دڤیا هەر هەیامەكا دەست نیشانكری ل گۆنگرەیی، دەستەیەكا نوو بێتە هلبژارتن و بنگەه خوە نوو بكە ژ بۆ كار و خەباتا رەوشەنبیری و جڤاكی.
هەر دگۆنگرێ ئیسال دە كو هژمارەكا زۆر مەزن ژ كەساتی و رەوشەنبیر و مال و كۆمەلێن كلتۆری ئامادەببون، میرێ ئێزدیان سەبارەت رۆل و پشتەڤانیا وی بۆ سەنتەرێن رەوشەنبیری و جڤاكی ژبال بنگەهێ لالش ڤە هاتە خەلاتكرن .
