نێچیرڤان بارزانی جێگری سەرۆكی پارتی دیموكراتی كوردستان، وەك نوێنەری سەرۆكی هەرێم و سەرۆكی حكوومەت، بەهاوڕێتیی شاندێكی پایەبەرزی حكوومەتی و حزبی بەمەبەستی تاوتوێی دۆخی سنوورەكان و باری تەناهیی ناوچەكە، شەوی رابردوو گەیشتە ئێران و بڕیارە لەگەڵ گەورە بەرپرسانی باڵای ئێرانی، لەوانە سەركۆمار و وەزیری دەرەوە كۆ ببێتەوە.

بەپێی سەرچاوەگەلی هەواڵ، نێچیرڤان بارزانی بەنوێنەرایەتیی مەسعوود بارزانی سەرۆكی هەرێمی كوردستان و بەرهەم ئەحمەد سالح سەرۆكی حكوومەتی هەرێم شەوی رابردوو گەیشتە باڵەفڕگەى نێودەوڵەتیی مێهرئابادی تاران.

وەك سەرچاوەكە ئاماژە دەكا، ئەم سەردانەی بارزانی پێوەستە بەدۆخی ئێستەی هەرێم و ناوچە سنوورییەكان، هەروەها بۆ گەڕانەوەی تەناهیی هەرێم و چارەسەركردنی كێشە سنوورییەكان بەڕێزگرتن لە یاسا نێودەوڵەتییەكان و سەروەریی خاكی یەكتری ئەنجام دەدرێ.

هەر پێوەست بەو باسەوە، ئەمڕۆ پەرلەمانی كوردستان لەبارەی گەڕی نوێی تۆپبارانی سنوورەكانی هەرێم لەلایەن ئێران و هێرشەكانی توركیا دانیشتنی نائاسایی ئەنجام دا.

بڕیارە ئەمڕۆ پێنجشەم نێچیرڤان بارزانی و شاندی هاوڕێی لەگەڵ مەحموود ئەحمەدی نەژاد سەركۆماری ئێران، سەعید جەلیلی سكرتێری ئەنجوومەنی باڵای تەناهیی نەتەوەیی و عەلی ئەكبەر ساڵحی وەزیری دەرەوەی ئەو وڵاتە دیدار ئەنجام بدەن، بەپێی سەرچاوەكە.

-ئاكانيوز