دوێنێ‌ رۆژی هەینی 4/3/2011 لە ماڵپەڕێكدا بڵاوكرایەوە كە گوایە بەڕێز مسعود بارزانی سەرۆكی هەرێمی كوردستان لە ژێر فشاری ویلایەتە یەكگرتووەكانی ئەمەریكا پەیامی هەڵبژاردنی پێشوەختی راگەیاندبێت، بۆیە ئێمە سەرلەبەری ئەوهەواڵە هەڵبەستراو و بێ بنەمایە رەتدەكەینەوە و بۆ گەلی گوردستان و رای گشتیش رایدەگەیەنین كە ئەوەی بڵاوكراوەتەوە ئاوەژووكردنەوەی راستییەكانە و پێچەوانەی هەواڵەكە راستە، لەبەر ئەوەی سەرۆك بارزانی بەهیچ شێوەیەك ناچێتە ژێر فشار و هیچ فشارێكیش قبووڵ ناكات، بەڕێزیان هەر هەڵوێستێك وەربگرن بۆ خزمەتكردنی بەرژەوەندییە باڵاكانی گەلی كوردستانە و لە هەر بڕیارێكیشدا تەنها وتەنها بەرژەوەندییەكانی گەل لەبەرچاو دەگرێ‌ كە خۆی لە پاراستنی ئەزموون و دەستكەوتەكانی گەلی كوردستاندا دەبینێتەوە.

سەبارەت بەوەش كە گوایە پەیامەكەی بەڕێز سەرۆكی هەرێم بە فشاری ئەمەریكا بووە، لە بەرامبەردا رایدەگەیەنین كە ویلایەتە یەكگرتووەكانی ئەمەریكا بەهیچ شێوەیەك ئاگاداری ئەو پەیامەی جەنابی سەرۆك نەبووە و بە پێچەوانەوە كاتێ‌ ئاگادار بوون زۆر پێی خۆشحاڵ بوون، ئەوە بوو دوابەدوای ئاگاداربوونیان بەڕێز جۆ بایدن جێگری سەرۆكی ویلایەتە یەگكرتووەكانی ئەمەریكا لە پەیوەندییەكی تەلەفۆنیدا دەستخۆشی لە سەرۆك بارزانی كرد بۆ ئەو هەڵوێستەیەی بەڕێزیان كە لە پەیامەكەیدا رای گەل و سندووقەكانی دەنگدانی كردۆتە مەرجەع وپێوەر بۆ چارەسەركردنی هەر كێشەیەك.



وتەبێژێكی رۆژنامەوانی لە

دیوانی سەرۆكایەتی هەرێمی كوردستان

5/3/2011