ئەندامانی هەر حزبێک لە کۆنگرەدا ئەو ئایدیا و ئامانج و بیروبۆچوونە سیاسییە دەکەنە پێوەری دەنگدان و هەڵبژاردنی ئەندامانی سەرکردایەتی خۆی کە لەسەری پەروەردە کراون، ئەوەش مافێکی رەوایە، چونکە ئەندامانی ئەو حزبە بڕوای تەواویان بەو ئایدیا و ئامانج و فکرە سیاسییە هەیە کە کار بۆ هێنانەدی دەکەن، بۆیە من بە رەوای دەزانم ئەندامانی هەر حزبێک کێ بۆ سەرکردایەتی خۆیان هەڵدەبژێن، بۆ نموونە:ــ
حزبێکی ئیسلامی لە رووی ئایدیا و ئامانج و بیروبۆچوونی سیاسی لە حزبێکی عەلمانی یان نەتەوەیی جیاوازە، بۆیە دەبێ لەکاتی کۆنگرە و هەڵبژاردنی ئەندامانی سەرکردایەتیش ئەو جیاوازییە لەبەرچاو بگرن، چونکە ئەگەر ئەو جیاوازییە لەبەرچاو نەگرن، ئەوا لەگەڵ ئایدیا و ئامانج و بیروبۆچوونە سیاسییەکەیان راستگۆ نین.
پێشینان گوتوویانە: هەر کەسە و گوێزان لە هەنبانەی خۆیدا دەژمێرێ، من وەک خۆم لەسەر رێبازی بارزانی نەمر پەروەردە کراوم، رێبازی بارزانی نەمریش تەژییە لە کوردایەتی و بڕوا بوون بە سەربەخۆیی کوردستان، کەواتە هەنبانەی من کوردایەتی و سەربەخۆیی کوردستانی تێدایە، بۆیە هەرکاتێک پارتی کۆنگرە ببەستێ، بەر لە هەموو شتێک چاو بەو پاڵێوراوانەدا دەگێڕم کە خۆیان بۆ سەرکردایەتی پاڵاوتووە، دیارە ئەو پاڵێوراوانە لە رووی بیرکردنەوە و هەزم کردنی رێبازی بارزانی نەمر جیاوازییان هەیە، جا هەر کامێکیان باشتر رێبازی بارزانی نەمری هەزم کردبێ و بڕوای بە کوردایەتی و سەربەخۆیی کوردستان پتەوتر بێ، دەنگ بەو پاڵێوراوە دەدەم، بەڵام مەرج نییە هەنبانەی خەڵکی حزبەکانی تر وەک هەنبانەی من کوردایەتی و سەربەخۆیی کوردستانی تێدابێ، بۆیە ئەویش لە کاتی هەڵبژاردنی ئەندامانی سەرکردایەتی خۆی دەست بۆ هەنبانەکەی دەبا و هەقی خۆشیەتی، جا ئەگەر بە رەوای بزانم لە کۆنگرەدا ئەوەی ناو هەنبانەکەی خۆم دایە بکەمە پێوەری دەنگدان، بە رەوا دەزانم خەڵکی حزبەکانی تریش ئەوەی ناو هەنبانەی خۆیان بکەنە پێوەری دەنگدان.