ڕەوشەنبیر ئێکە ژ کارتێکەرترین تەخێن ھەر جڤاکەکێ و ل ھەر دەم و قۆناغەکێ دا. ئەڤرۆ جەنابێ بارزانی، وەکی ھەر دەمەک دیتر، بۆ بەرژەوەندییا کوردستانیان دڤێتن ئەو تەخ ڤێ چەندێ بسەلمینن. بەلکۆ ڕەوشەنبیرەک د ڤی ئەرکی دا یێ دوودل بیتن یان کەفتبیتە بن کارتێکرنا فاکتەرێن خۆدی و دەرەکی و نەبابەتی دا، و بەلکۆ ژی د جیھانەکا ڕەشبینیێ دا ژی دەست و پێ ی ڕادژەنن و پرسیار بکەتن چەوا و بۆچی؟؟ دیارە ھەکەر مە بڤێتن ژ دەرگەھێ سایکۆلۆژیایێ ڤە بچین ژۆر و بەرسڤا گەلەک ژ ڤان جۆرە پرسیاران بدەین، ژبلی کۆ بێژن تنێ مرۆڤە ئەو بوونەوەرێ دشێتن ئەقلێ خۆ بکار بینیتن، وەکی بسپۆرێ بناڤۆدەنگێ سایکۆلۆژیایا پەروەردەیی، بنیامین بلووم ( B. Bloom) دبێژیتن د ئێک ژ بلندترین ئاستێن شیانێن خۆ یێن مێنتالی دا، مرۆڤ دشێتن ب ھەلسەنگاندنێ (evaluation) ڕابیتن، و ب ویژدانڤە دناڤ دیرۆکا مرۆڤاتیێ و بھایێن وێ یێن ڕاستین دا، بگەڕھیتن و دویر ژ مەژی ھشکی و بەرژەوەندیێ و خەون و خەیالێن ( وەھمی ) و ڕەشبینییا، کۆ ھندەک جاران بەرھەمێ دەستەکێ ڕەشێ نەحەز و دەرەکی و نافخۆیی نە، و وەکی ھندەکان ھیجەتێن وەکی کاراکرنا پەرلەمانی یان نەھێلانا گەندەلیێ و نەدادپەروەریێ و ... ھتد، بگریتن و وەسا ھزر بکەتن پێدڤییە کوردستان پێشی و پشتی ڕیفراندۆمێ ببیتە بەھشت و یۆتۆپیایەک، ھەکەر نە وەسا بیتن نەشێتن ببیتە دەولەت. لێ ئەو ژ بیر دکەن یان نەڤێتن خۆ تێبگەھینن ئەو بەھشت و یۆتۆپیا تنێ یا و دێ ل بەھشتێ ھەبیتن نە جھەک دیتر، و ھندی ڕۆژەکێ مرۆڤ لڤێ جیھانێ بن ئەو یۆتۆپیا دێ ھەر ب خەونەک مینیتن و چ جاران مرۆڤ نەشێتن و نەشیایە بەھشتەکێ لڤێ جیھانێ دروست بکەتن، دا تێدا گۆرگ و مە پێکڤە بچەرن. ئەڤە بەرھەمێ سروشت و مێنتالیتەیا مرۆڤاتیێ یە نە کەس و تشتەک دیتر.
فەرە ڕەوشەنبیر چاڤێن خۆ ڤەکەن و دەستا ژ خەون و خەیالێن چێکرن و ھاتنا یۆتۆپیایەکێ ل کوردستانێ بەردەن و ھەلسەنگاندنەکا بابەتیانەیا دۆھی و ئەڤرۆ و سۆباھیەکێ بکەن، و ب ترازییەکا دروست و نەژەنگی گرتی، ھەمی ھەلومەرجان بدەن بەر ئێک و بزانن کا ئایا چەند کەس و لایەن و وەلات دێ پاشەڕۆژێ ژ سەرکەفتن یان سەرنەکەفتنا ڕیفراندۆمێ مفادار یان زیانمەند بن. دیمۆکراسیترین و پێشکەفتیترین و دادپەروەرترین و دەولەمەندترین وەلاتان نەشیایە و نەشێن بەھشت و یۆتۆپیایێ بۆ خۆ و خەلکێ خۆ ئاڤا بکەن. لەوما وەکی باب و باپیرێن مە دبێژن " بەرێ مەزن نیشانا نەھاڤێتنێ " یە، ھێدی ڕۆژا ژبیرکرنا وێ بەھشتێ ژ سەر و مەژیێ خۆ بینین دەر و ب کێمێ ژی ڕازی ببین، و گازندە و نفرین و لەعنەتێن نڤشێ نۆکە و ئاییندەی نە ئیننە خۆ، و بۆ قۆرتالبوونا پشکەک ژ کوردستانیان ژ زیندانا سایکۆکۆلتووری، نەتەوەیی و سیاسییا پشکەک ژ داگیرکەران، ب لایەنێ کێمیڤە، ئەڤرۆ تاکێ کوردستانێ، ب ھەمی تەخ و چین و ئایین و نەتەوەیانڤە، ھەوجەی قەلەمێ خۆرتێ ڕەوشەنبیرانە. ھوین دشێن دەستی ژ ھندەک تشتێ خۆ بەربدەن دا گەلەک تشت بۆ گەلەکان بدەستڤە بھێتن، و لدویڤ بانگێ جەنابێ بارزانی بچن، تاکۆ ل ئاییندەی و ھەتاھەتایە سەرەکێ بلند و ناڤەکێ تێر باوەر، وەکی جاران، بۆ خۆ د بەرپەڕێن دیرۆکا کوردستان و مرۆڤاتی و جیھانێ دا تۆمار بکەن. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ