وەک پاڵپشتییەک بۆ حەشدی شەعبی لە بەغدا هەڵواسینی دروشم و پۆستەر لەدژی ئەمریکا و ئێسرائیل لە چەند هەفتەی رابردوو بە شێوەیەکی بەرچاو زیادیکردووە. بەشێک لە دانیشتووانی بەغداش بە تایبەت شێعە مەزهەبەکان پێیانوایە ئەمریکا بەرپرسە لە هێرشەکان بۆ سەر حەشدی شەعبی.

دانیشتوویەکی بەغدا دەڵێت، خەڵک لەڕێگەی پۆستەرەکان توڕەیی خۆیان بەرامبەر پێشێلکردنی سەروەری عێراق لەلایەن ئیسرائیل و ئەمریکا پیشاندەدەن.

عەباس کامیل، دانیشتووی بەغدایە دەڵێت "حەشدی شەعبی و بەشێک لە هێزە ئەمنییەکانی عێراق، ئازایانە شەڕی داعشیان کرد و لە عێراق وەدەریان نان، بۆیەش کاتێک درۆنەکانی ئەمریکا و ئیسرائیل بۆردوومانی بنکە سەرەکییەکانی حەشدی شەعبی دەکەن، لە راستیدا ئەوان بۆردوومانی سەروەری عێراق دەکەن".

لەسەر زۆربەی شەقامەکانی بەغدا ئەو درووشم و پۆستەرانە بە ئاشکرا هەڵواسراون و دەبیندرێن. دانیشتوویەکی دیکەی بەغدا ئاماژە بەوە دەکات "ئەمڕۆ خەڵک، توڕەیی خۆیان لە دژی هێرشە دووبارەکان و پێشێلکارییەکانی ئەمریکا و ئیسرائیل دەکەن و ئیدانەیان دەکەن لەڕێگەی ئەم خۆپیشاندانانە لە شەقامەکانی بەغدا".

هەرچەندە ئەمریکا رەتیدەکاتەوە هیچ پەیوەندییەکی بە هێرشەکانەوە هەبووبێت، بەڵام بەشێک لە عێراقییەکان، بەتایبەتیش شیعە مەزهەبەکان بۆچوونیان وایە ئەمریکا بەرپرسە لەو دۆخە و لەو هێرشانەش کە دەکرێتە سەر هێزەکانی حەشدی شەعبی، چونکە ئەمریکا پشتیوانی ئیسرائیل دەکات، ئیسرائیل بە گڵۆپی سەوزی ئەمریکا ئەو هێرشانە ئەنجامدەدات.