هێزە عێراقییەکان دەستیان بە ئۆپەراسیۆنی رزگارکردنەوەی ناوەندی شارۆچکەی حەویجە لە باشووری رۆژئاوای کەرکووک، کرد.



بەپێی زانیارییەکان، ئۆپەراسیۆنەکە بەرەبەیانی رۆژی چوارشەممە 4/10/2017 دەستی پێ کردووە و ئامانج لێی رزگارکردنەوەی ناوەندی حەویجە و شارەدێی ریازە لە شارۆچکەکە.



عەبدولئەمیر رەشید یاروڵڵا، فەرماندەی ئۆپەراسیۆنی رزگارکردنەوەی حەویجە رایگەیاندووە، کە هێزەکانیان بە ئاراستەی ئامانجە دیاریکراوەکانیان، پێشڕەویی دەکەن.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و شاری شنگال و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.




باسنیوز