هێزه‌ ئه‌منییه‌كانى عێراق توانییان والى شه‌رگاتى سه‌ر به‌ داعش كه‌ به‌نیاز بووه‌ به‌ جلى ئافره‌تانه‌وه‌ هه‌ڵبێت، ده‌ستگیر بكه‌ن.

ناوه‌ندى هه‌واڵه‌ نیشتمانییه‌كانى، بڵاوی كرده‌وه‌، كه‌ هێزه‌ ئه‌منییه‌كان له‌ كاتى پێشڕه‌ویكردنیاندا بۆ ڕزگاركردنى شارى شه‌ڕگات له‌ سنوورى پارێزگاى سه‌ڵاحه‌دین و به‌ پێی زانیارییه‌ هه‌واڵگرییه‌كان، توانییان والى داعشى ناوچه‌كه‌ به‌ناوى (ئه‌بوو عومه‌ر عه‌سافى) ده‌ستگیر بكه‌ن.

ئاماژه‌ به‌وه‌ش كراوه‌، "عه‌سافى" یه‌كه‌یه‌كی زانیارى (USB) پێبووه‌ كه‌ دۆسیه‌ و زانیارى ئه‌ندامانى داعشى تیادا بووه‌ به‌ ناوى ڕاسته‌قینه‌ و ناوى خوازراو و شوێنى نیشته‌جێبوونیانه‌وه‌.

هه‌ر به‌ پێی زانیارییه‌ بڵاوكراوه‌كان، به‌رپرسه‌كه‌ى داعش خۆى تێكه‌ڵ به‌ چه‌ند ئافره‌تێك كردووه‌ و به‌هه‌مان جله‌وه‌ به‌ پیری هێزه‌ ئه‌منییه‌كانه‌وه‌ ڕۆشتووه‌، دواى ده‌ستگیركردنیشى دانى به‌وه‌دا ناوه‌ كه‌ دوو له‌و ئافره‌تانه‌، هاوسه‌رى خۆی بوون و به‌مه‌به‌ستى ئاشكرا نه‌بوونى ئه‌و كاره‌ى كردووه‌.









باسنيوز