هەوڵێکی نوێ لە ئارادایە بۆ ئەوەی هەولێر و بەغدا لە ڕووی کێشەکانی تایبەت بە دۆسیەی نەوت و گازەوە ڕێککەوتنێکی نوێ واژۆ بکەن و بەرێوەبەری گشتی كۆمپانیای سۆمۆش پێی وایە ڕێكکەوتنی نێوان هەولێر و بەغدا لەبەرژەوەندی هەردوو لایە، حكوومەتی هەرێمی کوردستانیش ئامادەیی گفتوگۆی ڕاگەیاندووە.

د.فەلاح عامری، بەرێوەبەری گشتی كۆمپانیای بە بازاڕكردنی نەوت "سۆمۆ"ی عێراقی لە لێدوانێكی تایبەت ماڵپەڕی "وزە نیوز"ی ڕاگەیاندووە، "هەندێك هەوڵ هەیە لە نێوان هەرێمی كوردستان و حكوومەتی ناوەندی بە مەبەستی لێك نزیك كردنەوەی تێڕوانینەكانی هەردوولاو بەو هیوایەم هەوڵەكە سەركەوتوو بێ".

بەرپرسەکەی كۆمپانیای "سۆمۆ" سەبارەت بە ڕەنگدانەوەی ڕێكکەوتنی نێوان بەغدا وهەولێر گوتی، "ڕێکكەوتنی نێوان بەغدا و هەولێر بە قازانج بۆ هەردوو لایەن دەشكێتەوە و لە بەرژەوەندی گەلی عێراقیش دەبێ".

سەفین دزەیی وتەبێژی حكوومەتی هەرێمی كوردستان لەسەر ئەم بابەتە بە ماڵپەڕی "وزە نیوز"ی گوتووە، "حكوومەتی هەرێم هەمیشە ئامادەیە بۆ گفتوگۆ و ڕێككەوتن".

لای خۆشییەوە د. زاهیر مەجید، پسپۆڕ لە یاسا و گرێبەستەكانی نەوت تایبەت بە "ماڵپەڕی وزە نیوز"ی ڕاگەیاندووە، "ئەستەمە ڕێكکەوتنێكی توكمە و گشتگیر ئەنجام بدرێت، چونكە كێشەكان زۆر و گەورەن، زیاتریش پەیوەستن بە كۆنتڕۆڵكردن و ئیدارەدانی پرسەكانی نەوت و غاز".

گوتیشی، "دەكرێ ڕێكکەوتنێكی كاتی بكرێت لەسەر فروشتنی نەوتی كەركووك لەلایەن هەرێمی كوردستان لە ڕێگەی ڕێكکەوتنێك، بەڵام هەرگیز حكوومەتی هەرێم قبوڵ ناكات "سۆمۆ" كۆنتڕۆڵی فرۆشتنی نەوتی هەرێم بكات".










باسنيوز