سەرکردەیەکی حەشدی شەعبی لە عێراق رایدەگەیەنێت، کە ئەوان بڕیار و فەرمانەکان لە رێبەری باڵای کۆماری ئیسلامی ئێران وەردەگرن نەک لە سیاسەتمەدارانی عێراق.

ئەبو ئالا ئەلوەلائی، ئەمینداری گشتیی کەتیبەی (سەید ئەلشوهەدا)، کە یەکێکە لە گرووپەکانی میلیشیاکانی حەشدی شەعبیی شیعەمەزهەب، لە بەیاننامەیەکدا رایگەیاندووە، کە کەتیبەی سەید ئەلشوهەدا کەتیبەیەکی بیروباوەڕییە و هیچ پەیوەندییەکی بە زەوقی سیاسەتمەدارانی عێراقییەوە نییە.

ئەبو ئالا ئەلوەلائی هەروەها رایگەیاندووە، کە ئەوان بەشێکن لە سیستەمی ویلایەتی فەقیه لە ئێران و راستەوخۆ سەر بە عەلی خامنەیی، رێبەری باڵای کۆماری ئیسلامیی ئێرانن و فەرمانەکانیان لەو وەردەگرن.

دوای هێرشی رێکخراوی توندڕەوی داعش و داگیرکردنی پارێزگاکانی نەینەوا، سەڵاحەدین، دیالە و ئەنبار لە مانگی حوزەیرانی 2014 و شکستهێنانی سوپای عێراق، عەلی سیستانی، مەرجەعی باڵای شیعەکانی عێراق فەتوای دروستکردنی میلیشیای حەشدی شەعبی لە گەنجانی شیعە پێکهێنا.

دوای دروستبوونی میلیشیاکانی حەشدی شەعبی، حەیدەر عەبادی، سەرۆک وەزیرانی عێراق و فەرماندەی گشتیی هێزە چەکدارەکانی عێراق رایگەیاند، کە حەشدی شەعبی بەشێکە لە سیستەمی بەرگریی عێراق و راستەوخۆ سەر بە فەرماندەی گشتیی هێزە چەکدارەکانی عێراقە.

رێکخراوەکانی مافی مرۆڤ و سیاسەتمەدارانی سوننەی عێراق، میلیشیاکانی حەشدی شەعبی بە ئەنجام دانی تاوانی دژە مرۆڤایەتی تاوانبار دەکەن و بۆ ئەمەش گرتە ڤیدیۆییەکان بە بەڵگە دەهێننەوە، کە دوای رزگار کردنەوەی ناوچە جیاوازەکان، چەکدارانی حەشدی شەعبی بە زیندوویی هاووڵاتییە سوننەکان دەسووتێنن و بە چەقۆ و بە ئازارەوە دەیانکوژن.








باسنيوز