دادگای تاوانەکانی عێراق بڕیاری لەسێدارەدان لە دژی ئەندامانی گرووپێکی رفاندنی هاووڵاتییان دەردەکات، کە دوو ژنیشیان لە نێودایە.



دادوەر عەبدولستار بەیرەقدار، گوتەبێژی دەسەڵاتی دادوەریی عێراقی بە میدیاکانی وڵاتەکەی راگەیاندووە، کە ئەو دوو ژنە کاریان راکێشانی هاووڵاتییان بووە بە بیانووی پەیوەندیی سۆزداری و دواتر رفاندنیان.



بە گوتەی دادوەر عەبدولستار بەیرەقدار، دادگای تاوانی ناوەندیی عێراق بڕیاری لەسێدارەدانی بۆ ئەندامانی گرووپەکە دەرکردووە و بڕیارەکە چاوەڕێی تێهەڵچوونەوە لە دادگای تێهەڵچوونەوە دەکات.



هەروەک گوتەبێژی دەسەڵاتی دادوەریی عێراق رایگەیاندووە، ئەو گرووپە چەکدارییە دەستیان لە رفاندنی چەندین هاووڵاتیدا هەبووە، کە دوانیان ئەندامی هێزە ئەمنییەکانی بەغدا بوون و کەوتبوونە داوی ئەو دوو ژنەوە.



بەهۆی ناکارایی هێزە ئەمنییەکانی عێراق، گرووپە تیرۆریستی و رفێنەرەکان بەردەوام لە شارە جیاوازەکانی عێراقەوە هاووڵاتییان دەکوژن یاخود دەیانڕفێنن و بەرامبەر بڕێک پارە ئازادیان دەکەن.









باسنيوز