فڕۆکە جەنگییەکانی هاوپەیمانیی نێودەوڵەتی دژ بە رێکخراوی توندڕەوی داعش، نزیکەی 450 بنکەی ئەو رێکخراوەیان بۆردومان کردووە.



بەپێی راگەیەندراوێکی باڵیۆزخانەی ئەمریکا لە عێراق، کە وێنەیەکی گەیشتووەتە ، لە رۆژانی 3ـی ئایاری 2016 تاوەکو 9ـی ئایار، 39 بنکەی مووشەکهاوێژیی، 84 یەکەی چەکداری، 49 بنکەی بەرەکانی شەڕی ئەو رێکخراوە، 49 ئۆتۆمبێل و بارهەڵگر و 42 شوێنی کۆبوونەوەی چەکدارانی داعش بۆردومان کراون.



هەروەک لە راگەیەندراوەکەدا هاتووە، ئەم 443 بۆردومانانە لەو ماوەیە، لە شاری مووسڵ ئەنجام دراون.



وێڕای تێکشکاندن و بۆردومان کردنی ئەو بنکە و بارەگایانە، چەندین بارەگای دیکەی ئەو رێکخراوە لە شاری مووسڵ و دەوروبەری بۆردومان کراون.



دوای هێرشی چەکدارانی داعش لە مانگی ئابی 2014 بۆ سەر کوردستانی باشوور، ژمارەیەک وڵاتی ئەوروپی و رۆژئاوایی بە سەرکردایەتیی ئەمریکا، هاوپەیمانییەکیان پێکهێنا، کە لە رێی ئاسمانییەوە بنکە و بارەگاکانی داعش بۆردومان دەکەن.













باسنیوز