فڕۆكه‌كانی هاوپه‌یمانان زنجیره‌یه‌ك هێرشیان كرده‌ سه‌ر هه‌ردوو به‌ری شاری موسڵ، سه‌رچاوه‌كانی هه‌واڵیش له‌ناو شاره‌كه‌وه‌ ئه‌وه‌یان دووپات كرده‌وه‌ كه‌ هێرشه‌كان بنكه‌و باره‌گا و مۆڵگه‌كانی گروپی تیرۆریستی داعشیان كردۆته‌ ئامانج.

هاوكات وێستگه‌ی سوته‌مه‌نی "نه‌شمیه‌"ی ناوچه‌ی یه‌رموك و، ماڵی یه‌كێك له‌سه‌ركرده‌كانی داعش له‌ناوچه‌ی "حه‌دبا" كراونه‌ته‌ ئامانج.

هه‌ر له‌م چوارچێوه‌یه‌دا هاوپه‌یمانی نێوده‌وڵه‌تی ئه‌نجامدانی 22 هێرشی ئاسمانی بۆ سه‌ر بنكه‌و باره‌گاكانی داعش له‌عێراق و سوریادا ڕاگه‌یاند.

له‌ڕاگه‌یه‌نراوێكی فه‌رمی هێزه‌ هاوبه‌شه‌كانی هاوپه‌یمانی نێوده‌وڵه‌تیدا، ئه‌وه‌ دووپات كراوه‌ته‌وه‌ كه‌ 14 هێرش له‌عێراقدا ئه‌نجام دراون و، بوونه‌ته‌ هۆی خاپووركردنی 6 بنكه‌ی تاكتیكی داعش. جبه‌خانه‌ و كۆگای چه‌ك و ته‌قه‌مه‌نی داعشیش كراونه‌ته‌ ئامانج.

له‌ڕاگه‌یه‌نراوه‌كه‌دا هاتووه‌ 7 هێرشیش له‌سوریادا ئه‌نجام دراون، كه‌ بنكه‌ی تاكتیكی و كۆگای چه‌ك و ته‌قه‌مه‌نی كراونه‌ته‌ ئامانج.