“چەکدارە کوردەکانی ناو داعش دوای کوژرانیان ژنەکانیان بە چەکدارانی داعش دەدرێت”
بەپێی چەند زانیارییەک، ژنی ئەمیر و چەکدارە کوردەکانی نێو داعش، دوای ئەوە پیاوەکانیان لە لایەن داعشەوە یان لە شەڕەکاندا دەکوژرێن، بە چەکدارانی دیکەی ڕێکخراوە توندڕەوە دراون و بەشێکیشیان “جیهادی نیکاح”یان پێ کراوە. لەمبارەیەشەوە مەریوان نەقشبەندی، بەرپرسی پەیوەندییەکانی وەزارەتی ئەوقاف و کاروباری ئایینی، ڕاگەیاند: “لە کۆی ئەو 500 گەنجەی لە کوردستانەوە چوونەتە ناو داعش، ١٩یان ژن و منداڵیان لەگەڵ خۆیان بردووە، هەندێک لەو كوردانە کە کوژراون، لە چەکدارانی دیکەی داعش مارە کراونەتەوە”.
بەپێی زانیارییەکان، ئەو ژنانە بە خۆیان و منداڵەکانیانەوە بەو چەکدارانەی داعش دەدرێن کە ناوی خۆیان لە دادگای شەرعیی ڕێکخراوە توندڕەوەکە لە مووسڵ تۆمار کردووە، دوای کوژرانی چەکداری دووەمیش، ژنەکە بە پیاوێکی دیکە دەدرێت و ژنی وا هەیە لە ماوەیەکی کەمدا بەهۆی کوژرانی بەردەوامی چەکدارەکانی داعش، بە چەندین پیاو دراوە.
باسنیوز
