ئەندامێکی کورد لە ئەنجومەنی نوێنەرانی عێراق نامەیەکی ئاراستەی سەرۆک وەزیرانی عێراق دەکات و رایدەگەیەنێ، کە بەدادگاییکردنی ”نوری مالیکی“، سەرۆک وەزیرانی پێشتری عێراق، کێشەکانی عێراق چارەسەر دەبێت.



”عادل نوری“، پەرلەمانتاری عێراق لەفراکسیۆنی یەکگرتووی ئیسلامی کوردستان لەنامەیەکدا، کە ئاراستەی ”حەیدەر عەبادی“ سەرۆک وەزیرانی عێراقی کردووە، رایدەگەیەنێت، "کەوتن و رادەستکردنەوەی مووسڵ بە رێکخراوی توندڕەوی داعش راستەوخۆ نوری مالیکی لێی بەرپرسیارە، ئێمە دۆسیەکەمان یەکلاییکردەوە و رەوانەی دادگامان کرد تۆش ناوبراو رادەستی دادگا بکە".



لەو نامەیەدا، عادل نوری پێیوایە لە دۆسیەی سپایکەریشدا، کە تێیدا هەزار و 700 سەربازی عێراقی بە دەستی چەکدارانی داعش کوژران، ”ھەر نوری مالیکی تاوانبارە“ و جگە لەوەش، ”بەرپرسیارە لەدیارنەمان و بەھەدەردانی 500 ملیار دۆلار".



ئەو پەرلەمانتارە پێیوایە بە دەستگیرکردن و دادگاییکردنی سەرۆک وەزیرانی پێشتری عێراق، دەستگیرکردن و دادگاییکردنی گەندەل و تاوانبارەکانی دیکە ”ئاسانە و کەسیش ناوێرێ چیتر گەندەڵی بکات“.







باسنيوز