موقتەدا سەدر داوا لە لایەنگرانی دەكات راپەڕن‌و رۆژی هەینی داهاتوو لەبەردەم ناوچەی سەوزی شاری بەغدا چادر هەڵبدەن هەتاكو ئەو داواكارییانەیان جێبەجێدەكرێن كە تایبەتن بە ریشەكێشكردنی گەندەڵی.

موقتەدا سەدر، سەرۆكی ڕەوتی سەدر، ئەمڕۆ 12ی ئازار، لەبەیاننامەیەكدا ڕایگەیاند: "داوایەكی مێژووی لە هەموو عیراقییەكی دڵسۆز و چاكسازیخواز دەكەم كە ڕاپەڕن و قۆناغێكی نوێ لە ناڕەزایەتیە جەماوەرییە ئاشتیخوازەكان دەستپێبكەن و خۆتان سازو ئامادەبكەن بۆ هەڵدانی چادر. ئەمە كاتی ئێوەیە بۆ ڕیشەكێشكردنی گەندەڵی و گەندەڵكاران."

مانگی ڕابردوو موقتەدا سەدر، 18ی ئەم مانگەی وەكو دوا وادە دانا بۆ حەیدەر عەبادی، سەرۆك وەزیران، هەتا چاكسازی ئەنجامبدات و گەندەڵی ڕیشەكێش بكات.

داواكەی سەدر هاوكاتە لە گەڵ هەوڵەكانی عەبادی بۆ ئەنجامدانی چاكسازیی و پێكهێنانی حكومەتێكی تەكنۆكرات كە لەچەند مانگی رابردوودا ئەنجامیداوە، بریاریشە حكومەتێكی نوێ پێكبێنێت بە بەشداری پێكهاتە سەرەكییەكانی عێراق.