سەرۆک وەزیرانی تورکیا لە نامەیەکدا بۆ حەیدەر عەبادی، سەرۆک وەزیرانی عێراق حەیدەر عەبادی وردەکارییەکانی چوونی ئەو ھێزەی تورکیای روونکردووەتەوە عەبادی دڵنیا دەکاتەوە.



بەپێی هەواڵێکی ئەنادۆڵ، نووسینگەی ئەحمەد داودئۆغڵو، سەرۆک وەزیرانی تورکیا لە نامەکەدا بە عەبادی رادەگەیەنێت، وڵاتەکەی زۆر بە ھەستیاری مامەڵە لەگەڵ عێراق دەکات و ”تەنانەت کەمترین زیان بە فەرمانڕەوایی و سیستمی بەڕێوەبردنی ئەو وڵاتە ناگەیەنێت“ و پشتگیریی وڵاتەکەشی بۆ عێراق راگەیاندووە لە شەڕی دژی داعش.



داودئۆغڵو بەڵێنی داوە، کە تاوەکو ئەو کاتەی کێشەکانیان لەگەڵ عێراق چارەسەر دەکەن و ”ئەو گرژی و هەستیارییەی بەغدا دادەمرکێتەوە“، ھیچ ھێزێکی دیکەی وڵاتەکەیان بۆ شارۆچکەی بەعشیقە لە پارێزگای نەینەوا نانێرن.



کۆتایی هەفتەی رابردوو، هێزێکی سوپای تورکیا بە پشتیوانیی تانک و زرێپۆشەوە، گەیشتە ناوچەکانی پارێزگای نەینەوا و بە گوتەی ئەسیل نوجەیفی، فەرماندەی حەشدی نیشتیمانیی نەینەواش، ئەو هێزە مەشق و راهێنان بە هێزەکەی دەکات، وەک ئامادەکارییەک بۆ رزگارکردنەوەی موسڵ.



حەیدەر عەبادی، سەرۆک وەزیرانی عێراق و زۆربەی بەرپرس و پەرلەمانتارانی شیعە لە عێراق، دژایەتیی خۆیان بۆ هاتنی ئەو هێزەی سوپای تورکیا نیشانداوە و بە ”داگیرکاری و پێشێلکردنی سەرەوەریی عێراق“یان داناوە.



لە مانگی حوزەیرانی 2014ـەوە، رێکخراوی دەوڵەتی ئیسلامی (داعش)، دەستی بەسەر زۆربەی ناوچەکانی پارێزگای نەینەوا، دیالە و سەڵاحەدیندا گرت و دوای شکست و هەرەسهێنانی سوپای عێراق، ئەو ناوچانەی داگیرکرد.






باسنیوز