وەزارەتی دەرەوەی عێراق ئەمڕۆ باڵوێزی تورکیای فارۆق قەیمەقمچی لە بەغدا بانگهێشت کرد بۆ نارەزایی دەبڕین بەرامبەر جێگیرکردنی هێزێکی سەربازیی تورکیا لە ناوچەیەکی نزیکی شاری مووسڵ و داوای کشاندنەوەیان بکات.

وەزارەتی دەرەوەی عێراق لە راگەیەندراوێکدا گوتی: "هێزەکانی تورکیا بەبێ ئاگاداریی حکوومەتی ناوەندیی عێراق هاتوونەتە نێو خاکی عێراق و بەغدا ئەم هەنگاوە بە کارێکی دژ بە خۆی دەزانێ".

بەڵام ئەحمەد داوودئۆغڵۆ، سەرۆک وەزیرانی تورکیا رایگەیاند: "گۆڕینی هێزەکان کارێکی بەردەوامە و سەربازگەکە بە رێککەوتن لەگەڵ دەسەڵاتی عێراق دروستکراوە و ئەم سەربازگە بۆ مەشقپێکردنی هێزە خۆبەخشە خۆجێییەکان دامەزراوە بۆ نەهێشتنی تیرۆر".

سەرۆک وەزیرانی تورکیا گوتیشی: "سەربازگەکە 30 کیلۆمەتر لە باکووری رۆژهەڵاتی مووسڵەوە دوورە و نزیکەی ساڵێکە لەسەر داوای پارێزگاری مووسڵ و بە هەماهەنگیی لەگەڵ وەزارەتی بەرگریی عێراق دروستکراوە و سەربازگەکە تا ئێستا مەشقی بە دوو هەزار لە برایانمانی لە مووسڵ کردووە بۆ رزگارکردنی شارەکە لە بندەستی رێکخراوی دەوڵەتی ئیسلامیی تیرۆریست".

پێشتر نووسینگەی رۆژنامەوانیی سەرۆک وەزیرانی عێراق لە راگەیەندراوێکدا گوتی: "دڵنیاین هێزێکی زریپۆشی تورکیا کە قەبارەی نزیکەی فەوجێکە (1000 بۆ 3000 سەرباز) و تانک و تۆپخانەی پێیە هاتووەتە نێو خاکی عێراق".

نووسینگەی عەبادیی ئاماژەشی کرد کە: "ئەو هەنگاوەی تورکیا پێشێلکارییەکی ترسناکە بۆ سەروەریی عێراق و لەگەڵ پەیوەندیی دەرهاوسێیی گونجاو نییە، بۆیە پێویستە ئەو هێزە کوتوپڕ لە خاکی عێراق بکشێتەوە".











K24