دەستەی كۆنترۆڵكردنەوەی شاری موسڵ رایگەیاند، ئامادەكارییەكان بەردەوامن بۆ كۆنترۆڵكردنەوەی شاری موسڵ و بەشداریكردنی حەشدی شەعبی لەدەست چەكدارانی رێكخراوی داعش، هاوكات ئاماژەی بە بوونی هێزێكی سەربازی ئەمریكی گەورە كرد لە سنووری پارێزگای نەینەوا بۆ هاوكاریكردنی سوپای عێراق لەكاتی دەستپێكردنی ئۆپەراسیۆنی كۆنترۆڵكردنەوەی شارەكە.

زوهێر ئەعرەجی، ئەندامی دەستەی کۆنترۆڵکردنەوەی شاری موسڵ لە لێدوانێكی رۆژنامەڤانیدا گوتی: كەوتنی موسڵ بەدوو قۆناغ ئەنجامدرا، یەكەمیان سەنتەری شارەكە بوو لەگەڵ شارۆچكەكان و شارەدێكان كە پێشتر بەدەست حكومەتی عێراقییەوە بوون, دوومانگ دوای كەوتنی موسڵ و فراوانبوونی داعش ئەو یەكە كارگێڕیانەش كەوتنە دەست داعش كە لەژێر كۆنترۆڵی حكومەتی هەرێمی كوردستاندا بوون".

ئەعرەجی گوتیشی: ئەو دوو هۆكارەی جەستەی هێزە ئەمنییەكانی لە نەینەوا داڕزاند، وروژاندنی سیاسی و گەندەڵی بوو, ئێستاش ئامادەكارییەكان بەردەوامن بۆ كۆنترۆڵكردنەوەی شاری موسڵ، هاوكات هێزێكی سەربازی ئەمریكی گەورەش لە ناوچەی رەبیعە هەیە و چەندین راوێژكار و چەكداری لەخۆگرتووە بۆ هاوكاریكردنی سوپای عێراق لەكاتی دەستپێكردنی ئۆپەراسیۆنی كۆنترۆڵكردنەوەی شارەكە".

زوهێر ئەعرەجی هەروەها دەڵێت: " حەشدی شەعبی لە ئۆپەراسیۆنی كۆنتڕۆڵكردنەوەی شاری موسڵ بەشداردەبێت و هەماهەنگی بەردەوامیشمان لەگەڵ هەرێمی كوردستان هەیە لەمڕوەوە".

لە 26 شوباتی 2015 كەریم نوری گوتەبێژی سەربازی حەشدی شەعبی رایگەیاند، دوای كۆنترۆڵكردنەوەی هەردوو پارێزگای ئەنبار و سەڵاحەدین، بەبێ هیچ رووبەڕووبوونەوەیەك شاری موسڵ كۆنترۆڵدەكرێتەوە وەك چۆن داعش بەبێ رووبەڕووبوونەوە كۆنتڕۆڵیكرد، رەتیشیكردەوە هیچ كێشەو ناكۆكییەكییان لەگەڵ كورد هەبێت لەسەر پرسی بەرەنگاربوونەوەی داعش.










رووداو ـ