فراكسیۆنی دەوڵەتی یاسا رایگەیاند، بۆ دەستنیشانكردنی وەزیرانی نوێ‌ ئازادی رەهایان بە سەرۆكوەزیرانی عێراق بەخشیوە، لەبەرئەوە دەوڵەتی یاسا بەهیچ شێوەیەك دەست لە پرسی دەستنیشانكردنی وەزیرانی نوێ‌ وەرنادات.

عەلی ئەدیب، سەرۆكی فراكسیۆنی دەوڵەتی یاسا لە پەرلەمانی عێراق لە لێدوانێكی رۆژنامەڤانیدا گوتی: "ئیئتیلافی دەوڵەتی یاسا پابەندە بە كارنامەی چاكسازی پەرلەمان كە سێشەممەی رابردوو 11/8/2015 پەسەندی كردووە و، جەخت لەسەر هەڵبژاردنی وەزیرانی نوێ‌ دەكاتەوە، بە شێوەیەك دوور لە بەشبەشێنەی حیزبی و تایفی و بەپێی لێهاتویی و پاكی بێت، تەنانەت ئەم پرەنسیپە دەستە سەربەخۆكانیش دەگرێتەوە".

ئەدیب گوتیشی: "دەوڵەتی یاسا بە هیچ شێوەیەك دەست لەكاری حكومەت وەرنادات بۆ هەڵبژاردنی وەزیرانی نوێی، مەگەر سەرۆكوەزیران خۆی داوایبكات و راوێژمان پێبكات، هەروەها ئیئتیلافی دەوڵەتی یاسا پشتگیری تەواوی عەبادی دەكات بۆ جێبەجێكردنی چاكسازییەكان و لەمڕووەوە ئازادی رەهای پێبەخشیوە".

سێشەمەی رابردوو 11/8/2015 پەرلەمانی عێراق بە كۆی دەنگ كارنامەی چاكسازی حەیدەر عەبادی پەسندكرد، كە هەڵوەشاندنەوەی جێگرانی سەرۆككۆمار و سەركوەزیران و كەمكردنەوەی ژمارەی پاسەوانان و بڕینی دەرماڵە پلە تایبەتەكان و چەندین بڕیاری دیكەی لەخۆگرتبوو.

















روداو