وەك رەخنە گرتن لە لێدوانێكی نوری مالیكی جێگری سەرۆك كۆماری عێراق، كە رایگەیاندبوو، ئەوەی ئێستا لە عێراق روودەدات، شۆڕشێكی تائیفیە كە سوننە دژی شیعە بەرپای كردووە، “حەیدەر مولا” ئەندامی مەكتەبی سیاسی یەكێتی هێزی عێراقی سوننە لە لێدوانێكی رۆژنامەوانیدا رایگەیاند: شۆڕشی ئەوان دژی پێكهاتە شیعە نییە و تەئكیدیشی كردەوە، كەوتنی مووسڵ و ناوچەكانی ئەنبار، بەپێ پیلانگیری بووە.

مولا روونشیكردەوە، نێوەندەكانی شیعە زۆر بە بیری بەعسی و تەكفیریەكان كاریگەری زۆری كردووەتە سەریان و گوتیشی: “ئێمە لەگەڵ مالیكی هاوڕایان كە ئەوەی ئێستا روودەدات شۆڕشی پێكهاتەی سوننەیە، بەڵام دژی سیاسەت و دەسەڵاتی ستەمكارییە، ئەمەش ئاماژەیەكە بۆ ئەو هەشت ساڵەی پێشوو كە مالیكی لە كاتی سەرۆكایەتی حكوومەت سوننەی پەراوێز خستبوو”.

ئەندامەكەی مەكتەبی سیاسی هێزی یەكێتی سوننە ئاماژەی بەوەشدا: رۆڵەكانی پێكهاتەی سوننە رووبەڕووی ستەم و زوڵم لێكردن بە دوو ئاراستە بوونەتەوە، یەكەمیان ئەوەبوو، لە ساڵانی پێشوو دەسەڵاتێكی پەیڕەودەكرا ئەوانی پەراوێز خستبوو، دووەمیشیا ئەوەیە، كاتێ‌ شەڕی دژی چەكدارانی داعش سەری هەڵدا ئەوان لە هەموو پێداویستی شەڕ و چەك و تەقەمەنی بێبەشبوون، بۆیە شۆڕشی ئێستای سوننە دژی دەسەڵاتی فاشیزمە نەك دژی پێكهاتەكانی دیكە.




















باسنيوز