وەزارەتی بەرگری عێراق ڕایگەیاند، لە پارێزگای سەڵاحەدین بەهۆی بۆردومانەوە ١٦ چەکداری داعش کوژراون.


ئەمڕۆ سێشەممە، وەزارەتی بەرگری عێراق ئاماژەی بەوە کرد، فڕۆکە عێراقییەکا بۆردومانی چەکدارانی داعشیان کردووە لە کێڵگەی نەوتی عەجیل لە پارێزگای سەڵاحەدین و دوو ئۆتۆمبێلیان تێکشکاندوون، لە ئاکامی بۆردومانەکەشدا ١٦ چەکداری داعش کوژراون.

هاوکات ئەمڕۆ وەزارەتی بەرگری ئەمریکا ڕایگەیاند، سوپاى عێراق بە پاڵپشتى هێزى ئاسمانى هاوپەیمانان هێڵی پێشەوەى قەزاى بێجی و پاڵاوگەکەیان تێکشکاندووە و کۆنتڕۆڵکردنەوەى قەزاکەش بە تەواوەتى نزیکە.

ستیڤن وارن، وتەبێژى پنتاگۆن ڕایگەیاند، تا ئیستا پنتاگۆن ناتوانێ کۆنتڕۆڵکردنەوەى قەزاى بێجی و پاڵاوگەکەى ڕابگەیەنێت کە گەورەترین پاڵاوگەیە لە عێراقدا.

نزیکەی مانگێکە، شەڕ و پێکدادان لەنێوان چەکدارانى داعش و سوپاى عێراق لە قەزاى بێجی و پاڵاوگەکەى بەردەوامە، هەرچەندە یەکشەممەى ڕابردوو وەزارەتى بەرگرى عێراق کۆنتڕۆڵکردنەوەى تەواوى قەزاى بێجی ڕاگەیاند بەڵام سەرچاوەکان ئەو هەواڵە ڕەتدەکەنەوە و ئاماژە بەوە دەکەن تا ئێستاش شەڕ بەردەوامە.