وەزیری دەرەوەی عێراق جەختی لەسەر گرنگی هاوكاریكردنی عێراق لەلایەن رێكخراوە نێودەوڵەتییەكان كردەوەو داواشی لە رێكخراوی پزیشكانی بێ سنوور كرد، كار لەو ناوچانە بكەن كە لەلایەن سوپای عێراقییەوە كۆنترۆڵدەكرێنەوە.

دوای كۆبوونەوەی لەگەڵ فابیۆ فۆرجیۆن، سەرۆكی نێردەی رێكخراوی پزیشكانی بێ سنوور و شاندی یاوەری، ئیبراهیم جەعفەری، وەزیری دەرەوەی عێراق رایگەیاندووە، کە "وەزارەتی دەرەوەی عێراق ئامادەیە هاوكاری تەواو لەگەڵ رێكخراوی پزیشكانی بێ سنوورو لایەنە پەیوەندیدارەكان بكات بۆ ئاسانكردنی هاتنی رێكخراوەكان و هاوكاریكردنی خێزانە ئاوارە عێراقییەكان".

بەپێی بەیاننامەیەکی وەزارەتی دەرەوەی عێراق، ئیبراهیم جەعفەری لە کۆبوونەوەکەدا جەختی لەسەر گرنگی كاركردن لەو ناوچانە كردەوە، كە لەلایەن هێزە ئەمنییەكانەوە كۆنترۆڵ دەكرێنەوە و پێشتر لەبەردەست داعشدابوونە، سەرەڕای پێشكەشكردنی هاوكاری پزیشكی بۆ خێزانە ئاوارەكان و ئەو ناوچانەی باوەشیان بۆ كردوونەتەوە لە پێناو رێگرتن لە بڵاوبوونەوەی نەخۆشییەكان و پاراستنی ژینگەی ناوچەكان".

هەر بەپێی بەیاننامەكە، فۆرجیۆن گوتویەتی: "رێكخراوی پزیشكانی بێ سنوور هەموو هەوڵێكی دەخاتە گەڕ لە پێناو دابینكردنی پێداویستی و چاودێری پزیشكی بۆ خێزانە ئاوارەكان، هاوكات تیمەكانی رێكخراوەكەش لە سەرجەم پارێزگاكانی عێراق بەدوادچوونی تەواو بۆ رەوشی ئاوارەكان دەكەن".

لە چەند رۆژی رابردوو هێزە ئەمنییەكانی عێراق و هێزەکانی پێشمەرگە بە پاڵپشتیی هێزی میلیشیا شیعە خۆبەخشەکان، ژمارەیەك ناوچەیان لە سنووری پارێزگای دیالەو موسڵ كۆنترۆڵكردووەتەوە، كە پێشتر لەبەردەست داعش دابوون.







رووداو