موقتەدا سەدر، رابەری رەوتی سەدری شیعە مەزهەب لە عێراق، رایگەیاند، راسپاردنی حەیدەر عەبادی، كاندیدی هاوپەیمانی نیشتمانی شیعە بۆ پێكهێنانی حكومەتی داهاتووی عێراق نیعەمەتێكی خواوەندە و نابێ حیزبی دەعوەش پەنا بۆ تووندوتیژی بنبات.

موقتەدا سەدر لە بەیاننامەیەكدا رایگەیاند: "راسپاردنی حەیدەر عەبادی، كاندیدی هاوپەیمانی نیشتمانی شیعە بۆ پێكهێنانی حكومەتی داهاتووی عێراق نیعەمەتێكی خواوەندە و یەكەم هەنگاوی ئەرێنییە لە پرۆسەی سیاسی و دەبێ هەمووان هاوكار بن بۆ سەرخستنی و هەینی داهاتووش ئاهەنگی بۆ بگێڕن".

رابەری رەوتی سەدر هاوكات داوای لە حیزبی دەعوەی ئیسلامی بە سەرۆكایەتی نووری مالیكی كرد، "لە ئاستی بەرپرسیارێتی مێژوویی بن و پەنا بۆ تووندوتیژی نەبەن".

موقتەدا سەدر ئاماژەی بەوەشدا، كە "راسپاردنی حەیدەر عەبادی كۆتایی بە گەورەترین قەیرانی عێراق دەهێنێ، كە گەلی عێراق بەدەستییەوە دەناڵێنن. ئەم دەستكەوتەش دەرئەنجامی یەكگرتن و هەماهەنگی كورد، سوننە و شیعەیە لە عێراق".

رۆژی دووشەممە 11.8.2014، فوئاد مەعسوم، سەرۆككۆماری عێراق، حەیدەر عەبادی، كاندیدی هاوپەیمانی نیشتمانی شیعە بۆ پێكهێنانی حكومەتی داهاتووی عێراق راسپارد، بەڵام مالیكی ئەو هەنگاوەی بە تووندی رەتكردەوە و بە نادەستووری ناوبرد.







رووداو