بەرپرسێكی كورد لە پارێزگای موسڵ رایدەگەیەنێ، داعش بڕیارێكی نوێی بۆ دانیشتوانی مووسڵ دەركردووە و بەپێی بڕیارە نوێیەكەی داعش، هەر خێزانێك سێ پیاوی تێدابێت، پێویستە یەكێكیان بچێتە بەرەی شەڕ.


سەعید مەمووزینی، كارگێڕی لقی 14ی موسڵی پارتی دیموكراتی كوردستان لە لێدوانیكدا بۆ ئاژانسی هەواڵی (پەیامنێر) رایگەیاند، دەوڵەتی ئیسلامی لە عێراق و شام رۆژ به‌ رۆژ بڕیاری نوێ بۆ دانیشتوانی ژێر دەستەڵاتی خۆی دەردەكات و لە رێگەی بلنگوی مزگەوتەكانەوە بە هاوڵاتیانی ناوچەكانی ژێر كۆنتڕۆڵی خۆی رادەگەیەنێ".

بەرپرسەكەی پارتی گۆتیشی" لە نوێترین بڕیاریدا، چەكدارانی داعش فەرمانێكی نوێیان دەركردووە و بە گوێرەی فەرمانەكە، هەر خێزانێك ئەگەر سێ پیاوی تێدابێت، پێویستە یەكێكیان بچنە بەرەی جەنگەوە و لە رێزی چەكدارانی داعش شەڕ لە دژی كورد و سوپای عێراق بكەن، بەپێچەوانەوە سزا دەدرێت و (جزیە)ی لێ وەر دەگیرێت".

مەمووزینی ئاماژەی بۆ ئەوەشكرد، بڕیارەكانی داعش بۆتە هۆی دڵگرانی هاوڵاتیان شاری موسڵ بە هەموو پێكهاتەكانەوە و هێدی هێدی، دانیشتوانی موسڵ مال و حالی خۆیان بەجێ دێلن و بەرەو ناوچە ئازادكراوەكان ئاوارە دەبن".