دوای ئەوەی گرووپی دەوڵەتی ئیسلامی عێراق و شام ناسراو بە داعش، دەستی بە سەر دامودەزگا حکومییەکانی شاری موسڵ و چەند شارێکی دیکە داگرت، پاسپۆرتێکی تایبەت بە موسڵیان دەرکرد.



سەعید مەموزینی، بەرپرسی مەكتەبی راگەیاندنی لقی ١٤ی پارتی دیموکراتی کوردستان بە ئاژانسی هەواڵی پەیامنێری راگەیاند؛ دوای کشانەوەی سوپای عێراق لە شاری موسڵ و قەزای تەلەعفەر، سەرجەم دامودەزگا حکومییەکان کەوتە ژێر دەسەڵاتی چەکدارانی داعش.



بە وتەی مەموزینی گرووپی دەوڵەتی ئیسلامی عێراق و شام(داعش) دەستیان بە دروستکردنی پاسپۆرتێکی تایبەت بە شاری موسڵ کردووە.



بەرپرسی مەكتەبی راگەیاندنی لقی ١٤ی پارتی دیموکراتی کوردستان گووتی: بڕیاری داعش بۆ دروستکردنی پاسپۆرت، پێچەوانەی یاسا و رێنمایەكانی وەزارەتی ناوخۆی عیراقە و هەڵگری پاسپۆرتی داعش لێپێجێنەوەی یاسایی لە گەڵ دەکرێت.



سەعید مەموزینی گووتی: وەزارەتی ناوخۆ بۆ ڕێگرتن لە مامەڵە کردن بەو پاسپۆرتە چەند فەرمان و رێوشوێنێكی دەرکردووەو پۆلیسی ئەنتەرپۆلیش ئاگادار کراوەتەوە.



بەرپرسی مەكتەبی راگەیاندنی لقی ١٤ی پارتی دیموکراتی کوردستان باسی لەوەشکرد، وەزارەتی ناوخۆی عیراق سەرجەم دەزگا ئەمنی و بازگە سنورییەکانی ئاگادار کردۆتەوە ڕێگە لە کار پێکردنی بەو پاسپۆرتە بگیرێت و داوای لە هاوڵاتییانیش کردووە هاوکاری دەزگا ئەمنییەکان بکەن.



سەعید مەموزینی ڕایگەیاند؛ هەڵگری پاسپۆرتی گروپی دەولەتی ئیسلامی عێراق و شام(داعش) لە هەر ووڵات و فرۆكەخانەیەک بێت، دەستبەجێ دەستگیر دەكرێت و لێپێچینەوەی یاسایی لە گەڵ دەکرێت.