حوسەین یەزدانپەنا جێگری سەرۆكی پارتی ئازادیی كوردستان.. پارتی ئازادیی كوردستان حزبێكی رۆژهەڵاتی کوردستانە لە دەستپێكی شەڕی داعش بۆ سەر كوردستان، بەشداری ئەم شەڕەیان كردووە...

سەرۆك مسعود بارزانی لە ساڵی 2010 و لەمیانەی كۆنگرەی 13ی پارتی دیموكراتی كوردستان ئامانجی سەرەكی خۆی راگەیاند كە دروستبوونی دەوڵەتی كوردستانە، لەو كاتەوە هەتا ئێستا، دوژمنان و ناحەزانی كوردستان هێرشێكی نارەوا دەكەنە سەر شەخسی سەرۆك بارزانی و پارتی دیموكراتی كوردستان ، سەبارەت بەم پرسە بەرێز حوسەینی یەزدان پەنا جێگری سەرۆكی پارتی ئازادی كوردستان بەمجۆرە هۆكاری ئەو هێرشانەی بۆ گوڵان خستەروو: (لەو رۆژەوە كە بەڕێز كاك مسعود بارزانی لە كۆنگرەی 13ی پارتی دیموكراتی كوردستان رایگەیاند، ئەجیندای سەرەكیی خۆی كاركردن دەبێت بۆ مافی چارەنووس و دەوڵەتی كوردستان، ئەوا شەپۆلێكی بەرفراوانی هێرشی میدیایی لە لایەن میدیاكانی ئێرانەوە دەكرێتە سەر سەرۆك بارزانی، هەروەها ئەم شەپۆلە قازی محەمەد و مەلامستەفا بارزانی-یشی گرتۆتەوە، من هەر ئەو كات تێگەیشتم ئەمە هەوڵێكی سەرەكیی ئێرانە بۆ دژایەتی رەوتی سەربەخۆیی لە باشووری كوردستاندا، ئاشكراشە لەو كاتەوە هەر حزبێكی سیاسی دژایەتی رەوتی سەربەخۆیی و دەوڵەتی كوردستان بكات، ئێران زۆر بە گەرمی پشتگیری لێدەكات، بۆیە گرنگە نەك تەنیا پەكەكە، بەڵكو حزبە سیاسییەكانی باشووری كوردستان ئەم راستیەیان لا ئاشكرا بێت و خزمەتی ئەجیندای دەرەكی نەكەن، لەم ماوەیەدا كاك ئازاد جوندیانی بابەتێكی لەسەر سەربەخۆیی بڵاوكردەوە كە كاردانەوەی ئەو هەوڵانەیە كە ئێستا بوونی هەیە.)