ئەگەر چەندین دەستە جلیشت هەبێت، بێگومان پێویستت بە پارچەیەكی سپی دەبێت، چونكە جلی سپی بە ستایل و جلی شاهانە ناسراوە، هەندێ جاریش بەبێ جلێكی سپی مۆدی جلەكەت نەشیاو و ناڕێك دەبێت، هەندێ لە ئافرەتانیش زیاتر حەز بە پۆشینی جلی سپی دەكەن، یان بەشێكی جلەكانیان رەنگی سپی تێدایە، جلی سپی هێندە جوانە، بەڵام پیسبوونی ئاسانە و ئەوەش كێشەیەكە دووچاری هەموو خانمان دەبێتەوە. بەڵام بەم هەنگاوانە دەتوانی جلی سپی لە پیسبوون بپارێزیت:
كاتێك جلی سپیت لەبەرە، هەوڵبدە خۆت بیپارێزیت و لە شوێنی پیس دانەنیشیت، یان ئاگاداری جلەكەت بە، كاتێك نیازت وایە لە شوێنێك بوەستیت، هەروەها لە كاتی ناندێن و خواردن، دەستەسڕی چێشتخانە، یان كلینیكس لەسەر كۆش و بەرۆكت دابنێ. لەلایەكی دیكەوە ئەگەر خواردنێكی رەنگدارت نۆش كرد، دەستێكت بخە ژێر گەردنتەوە. باشترە لەگەڵ جلی سپی، پووتی درێژ لەپێی بكەیت تا لە دەرەوە جلەكەت بپارێزیت، بەتایبەت ئەگەر پانتۆڵێكی سپیت پۆشیبوو. چاكترە جلی سپی بۆ شوێنی فەرمی و بۆنە و یادەكان بپۆشیت، چونكە ئەو شوێنانە پاكن و لە پیسبوون بەدوور دەبیت. كاتێك بەدی و بلووزی سپیت لەبەر دەبێت، چاكێتێكیش لەبەر بكە، تا جلەكەت هەردەم پاك بێت، هەروەها قەڵەمی پەڵە و شامپۆیەكی بچووكی پاككردنەوە هەمیشە لەنێو جەنتاكەتدا بێت بۆ ئەو كاتانەی كە جلە سپییەكەت پیس دەبێـت، بتوانی پاكی بكەیتەوە.