هەندێ لە خانمان لە هەڵبژاردنی كەرەستە و ئێكسسواردا هەڵە دەكەن، رەنگە كەرەستەیەكی جوان و گرانبەها لە نرخدا بكڕن، بەڵام دواتر پێیان جوان نابێت، هۆكاریش دەگەڕێتەوە بۆ شێوەی گونجاندنی ئەو كەرەستەیە لەگەڵ جل و بەرگ بەشەكانی دیكەی جوانیت، ئەگەر پێڵاو بۆ نموونە وەربگرین، دەبینن زۆربەی خانمان سەركەوتوون لە هەڵبژاردنی ئەو كەرەستەیەدا، هەندێ جاریش زۆربەی كچان هەڵە دەكەن لە هەڵبژاردنی شێوە و رەنگی پێڵاو، لێرەدا تیشك دەخەینە سەر ئەو زانیاریانەی لەلایەن پسپۆرانەوە خراوەتە روو لەسەر هەڵبژاردنی پێڵاوێكی شیاو بۆ خانمان : كاتێك پانتۆڵێكی جینز یان قوماش لەبەر دەكەیت، دەبێ رەچاوی خوارەوەی پانتۆڵەكەت بكەیت، واتە ئەگەر خوارەوەی پانتۆڵەكەت تەسك بوو، واچاكە پێڵاوێكی گەورە لە پێ بكەیت، پێچەوانەی ئەوەش راستە، ئەگەر خوارەوەی پانتۆڵەكەت گەورە بوو، پێڵاێكی بچووك لەپێ بكە. لە بارەی رەنگی پێڵاو و جل و بەرگەوە، دەبێ رەچاوی ئەو لایەنە بكەیت، كە ئەوەش بەپێی خواستی كچانەوە دەوەستێ، هەندێ لە كچان حەز دەكەن رەنگی پێڵاو و جلیان جیاواز بێت، یان لەگەڵ رەنگی جەنتا و ئێكسسواردا هاورەنگی دەكەن، بەڵام چاكترە رەنگی پێڵاو لەگەڵ رەنگی جل و بەرگدا لە دوو رەنگی جیاواز بن. لە بیریش مەكە هەمیشە پێڵاوی پێوانەی خۆت لەپێی بكە، چونكە كاتێك پێوانەی پێڵاوەكەت گەورەتر دەبێت لە پێوانەی پێی، دەبێتە هۆی نەوازە و نەشیاوی لە هەڵبژاردنتدا، هەروەها ئەگەر تەسكیش بێت، ناڕەحەتت دەكات و بێزار دەبیت.
